សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់បានធ្វើសកម្មភាពលួចកាច់សោ.ក ម៉ូតូមួយគ្រឿងបានសម្រេច តែជិះបានកន្លះថ្ងៃម៉ូតូក៏អស់សាំង រួចហើយត្រូវបានមិត្តភក្តិជនរងគ្រោះឃើញឃាត់ខ្លួនប្រគល់ឲ្យសមត្ថកិច្ច។ ករណីកាច់កម៉ូតូបានសម្រេចខាងលើ បានកើតឡើងនៅវេលាម៉ោង៧ព្រឹក ថ្ងៃទី២៣ ខែកុម្ភៈ ឆ្នាំ២០១៧ នៅចំណុចផ្ទះជួល ស្ថិតក្នុងភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ។
នារីរងគ្រោះមានឈ្មោះ ជុង ចាន់ណារី អាយុ២៥ឆ្នាំ មុខរបរបុក្គលិកក្រុមហ៊ុន ស្នាក់នៅកន្លែងកើតហេតុខាងលើ និងជាម្ចាស់ម៉ូតូម៉ាកនិច ពណ៌ស ពាក់ស្លាកលេខភ្នំពេញ1FJ.0709 ។ ចំណែកជនសង្ស័យមានឈ្មោះទី១ ចាន់ រ៉ាត់ ភេទប្រុស អាយុ១៦ឆ្នាំ និង ទី២ ឈ្មោះ ខៀវ ទិត្យ ភេទប្រុស អាយុ១៨ឆ្នាំ អ្នកទាំង២មានមុខរបរមិនពិតប្រាកដ ស្នាក់នៅសង្កាត់បឹងកក់២ ខណ្ឌទួលគោក ។
បើតាមសម្ដីនារីរងគ្រោះបានប្រាប់ឲ្យដឹងថា នៅថ្ងៃកើតហេតុម៉ោងប្រហែលជិត៧ព្រឹក រូបគាត់បានក្រោកពីគេង ហើយដើរចុះពីលើផ្ទះមកក្រោម ខណះនោះគាត់ស្រាប់តែបាត់ម៉ូតូរបស់គាត់ដែលទុកនៅក្រោមផ្ទះ ។ នារីរងគ្រោះបានប្រាប់បន្តថា ក្រោយមករូបគាត់ក៏បានមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋានស្ទឹងមានជ័យ ដើម្បីជួយអន្តរាគមន៍ ។
បើតាមប្រភពព័ត៌មានពីសមត្ថកិច្ចប៉ុស្ដិ៍នគរបាលរដ្ឋបាលស្ទឹងមានជ័យ បានឲ្យដឹងថា ជនសង្ស័យទាំង២នាក់ដែលឃាត់ខ្លួនបាននោះគឺ ដោយសាតែជនសង្ស័យទាំងពីរនាក់ក្រោយពីលួចកាច់សោ ក ម៉ូតូបានសម្រេចហើយ ពួកគេជិះម៉ូតូបានតែមួយថ្ងៃក៏អស់សាំងនៅព្រឹកថ្ងៃទី២៤ ដោយជនសង្ស័យបានបណ្ដើរម៉ូតូស្របពេលនោះមានមិត្តភ័ក្តជនរងគ្រោះឃើញនិងស្គាល់ម៉ូតូ ក៏ឃាត់ខ្លួនជនសង្ស័យឲ្យទៅសមត្ថកិច្ចប៉ុស្ដិ៍បឹងកក់២ ។ បន្ទាប់ក្រោយមកសមត្ថកិច្ចប៉ុស្ដិ៍នគរបាលរដ្ឋបាលបឹងកក់២ បានប្រគល់ជនសង្ស័យទាំង២នាក់រួមនិងវត្ថុតាង(ម៉ូតូនិចមួយគ្រឿង)ឲ្យមកប៉ុស្ដិ៍ស្ទឹងមានជ័យចាត់ការបន្តតាមច្បាប់ ព្រោះករណីខាងលើជាដើមបណ្ដឹងមូលដ្ឋានរបស់ប៉ុស្ដិ៍ស្ទឹងមានជ័យ។
បច្ចុប្បន្នជនសង្ស័យទាំង២នាក់ ត្រូវសមត្ថកិច្ចប៉ុសិ៍នគរបាលរដ្ឋបាលស្ទឹងមានជ័យ កំពុងឃាត់ខ្លួននិងកសាងសាណុំរឿងដើម្បីបញ្ចូនទៅអធិការដ្ឋាននគរបាលខណ្ឌមានជ័យចាត់ការបន្តតាមនីតិវិធីច្បាប់ ។ ចំណែកឯម៉ូតូ សមត្ថកិច្ចបានប្រគល់ឲ្យនារីរងគ្រោះយកទៅវិញផងដែរ ៕ ភារ៉ា ដង្កោ
