សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កូនតុងទីនប្រមាណជាង១០នាក់ បានឃាត់ខ្លួនមេតុងទីនប្រគល់ឲ្យនគរបាលប៉ុស្ដិ៍ព្រែកតាសេក កាលពីម៉ោង២រសៀល ថ្ងៃទី២៦ ខែកុម្ភៈ ឆ្នាំ២០១៧ ស្ថិតនៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា ។
សមត្ថកិច្ចនគរបាលប៉ុស្តិ៍ព្រែកតាសេកបានឲ្យដឹងថា ស្ដ្រីដែលជាមេតុងទីន មានឈ្មោះ សុខ សំណាង អាយុ២២ឆ្នាំ ហៅភន មានទីលំនៅនៅភូមិឃុំ កើតហេតុខាងលើដែលកូនតុងទីនចោទថារំលោភលើសេចក្ដីទុកចិត្ត។
តាមសម្ដីកូនតុងទីនបានឲ្យថា ពួកគាត់បានលេងតុងទីនជាមួយស្ដ្រីខាងលើ ជាច្រើនក្បាលមាន ក្បាល១០០ដុល្លារ ៥០ដុល្លារ ២០ដុល្លារ និង១០ដុល្លារជាដើម ហើយមានដេញ១ខែម្ដង កន្លះខែម្ដង ១សប្ដាហ៍ម្ដង និងក្បាលខ្លះដេញរាល់ថ្ងៃ ក៏មានដែរ ហើយការលេងនេះ មានមានរយៈពេលច្រើនឆ្នាំមកហើយ ស្រាប់តែនៅថ្ងៃទី២១ ខែមករា កន្លងមកនេះ ស្ដ្រីដែលជាមេតុងទីន បានបិទទ្វារចាក់សោផ្ទះ គេចខ្លួនបាត់ដំណឹងសូន្យឈឹង។
លុះដល់រសៀលថ្ងៃទី២៦ កុម្ភៈ នេះពួកគាត់ជាកូនតុងទីន បានទាក់ទងទៅស្រ្តីជាមេតុងទីនបាន រួចក៏ណាត់ជួបគ្នានៅផ្ទះរបស់មេតុងទីននោះ ហើយបានជជែកគ្នារហូតក្លាយជាទំនាស់បង្កឲ្យមានភាពឆោរឡោឡើង។ នៅក្នុងហេតុការណ៍នេះដែរ បុរសដែលជាប្ដីរបស់មេតុទីន ត្រូវបានកូនតុងទីនចោទថា បានដកកាំភ្លើងគំរាមពួកគាត់ទៀតផង ទើបបណ្ដាលឲ្យពួកគាត់នាំគ្នាឲ្យសមត្ថកិច្ចនគរបាលប៉ុស្ដិ៍ព្រែកតាសេក ជួយធ្វើអន្តរាគមន៍ ព្រមទាំងពួកគាត់បាននាំគ្នាផ្ដិតមេដៃធ្វើពាក្យបណ្ដឹងមេតុងទីនរូបនោះ និងឈានទៅការចាប់ឃាត់ខ្លួនតែម្តង។
បើតាមសម្ដីសមត្ថកិ្ចនគរបាល ប៉ុស្ដិ៍ព្រែកតាសេកបានឲ្យដឹងទៀតថា ប្រាក់ដែលមេតុងទីនបានបោកនោះ ហើយត្រូវកូនតុងទីនទាំង១៣ម្នាក់បានប្ដឹង មានទឹកប្រាក់ប្រមាណជិត១០ម៉ឺនដុល្លារ ក្រៅពីនោះនៅមានកូនតុងទីនផ្សេងៗទៀតពុំទាន់បានដាក់ពាក្យបណ្ដឹងមានទឹកប្រាក់ជាច្រើនម៉ឺនដុល្លារទៀត៕ ជ្រោយពេជ្រ
