សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសវ័យចំណាស់ម្នាក់បានបាត់បង់ជីវិតភ្លាមៗនៅនឹងកន្លែងកើតហេតុ ដោយសារគ្រោះថ្នាក់ចរាចរណ៍រថយន្តមិនស្គាល់ម៉ាកមួយគ្រឿង បានបុកពេញទំហឹងបណ្ដាលឲ្យខ្ទាតចូលរថយន្តមួយគ្រឿងទៀតម៉ាកវីហ្គោ។
ហេតុការណ៍ខាងលើនេះបង្កការភ្ញាក់ផ្អើលឡើងកាលពីវេលាម៉ោង៩ និង៤៥នាទីព្រឹក ថ្ងៃទី១៦ ខែមីនា ឆ្នាំ២០១៧ នៅលើកំណាត់ផ្លូវជាតិលេខ ៥ ត្រង់ចន្លោះបង្គោលគីឡូម៉ែត្រលេខ ២០៤-២០៥ ស្ថិតក្នុងភូមិស្នាយទោល ឃុំត្រពាំងជង ស្រុកបាកាន ខេត្តពោធិ៍សាត់។
នគរបាលផ្នែកចរាចរណ៍ នៃអធិការដ្ឋាននគរបានស្រុកបាកានឲ្យដឹងថា ជនរងគ្រោះមានវ័យចំណាស់អាយុប្រហែល ៦០ឆ្នាំ សង្ស័យវិកលចរិត មិនស្គាល់អតសញ្ញាណ ធ្វើដំណើរលើចិញ្ជើផ្លូវ ក្នុងទិសដៅពីកើតទៅលិច លុះមកដល់ចំណុចកើតហេតុ ត្រូវបានរថយន្តមួយគ្រឿងម៉ាក សាំយ៉ុង ពណ៏ស ពាក់ស្លាកលេខ សៀមរាប 2A 7570 ធ្វើដំណើរក្នុងទិសដៅពីលិចទៅកើតបានបុកពេញទំហឹង បណ្ដាលឲ្យខ្ទាតមកចូលរថយន្តមួយគ្រឿងទៀតស្លាប់បណ្ដាលឲ្យភ្លាមៗ ចំណែកអ្នកបរបានរត់គេចខ្លួនបាត់ស្រមោល។
ប្រភពព័ត៌មានខាងលើបន្តថា រថយន្តដែលត្រូវបានរថយន្ត(សាំយ៉ុង)បុកមនុស្សស្លាប់ខ្ទាតមកចូលនោះម៉ាក វីហ្គោ ពណ៏មាស ពាក់ស្លាកលេខ ចង្កូតស្ដាំ BMC 0003 បើកបរដោយឈ្មោះ បាន គឹមសួន ភេទប្រុស អាយុ ៣៧ឆ្នាំ ជនជាតិខ្មែរ បច្ចុប្បន្នរស់នៅស្ថិតក្នុងភូមិ-ឃុំភ្នំតូច ស្រុកមង្គល់បូរី ខេត្តបន្ទាយមានជ័យ។
ប្រភពដដែលបន្តទៀតថា វត្ថុតាងខាងលើ ត្រូវបានសមត្ថកិច្ចយកទៅរក្សាទុកជាបណ្ដោះអាសន្ន រង់ចាំដោះស្រាយគ្នាតាមផ្លូវច្បាប់ជាក្រោយ ចំណែកជនរងគ្រោះសមត្ថកិច្ចកំពុងដុតដៃដុតជើង ធ្វើការស្រាវជ្រាវរកអត្តសញ្ញាណ និងចាត់ចែងតាមនីតិវិធី៕ ប៉ឹម ពិន
