សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ បុរសចំណាស់ម្នាក់ត្រូវបានចរន្តអគ្គិសនីឆក់ធ្លាក់ចូលទឹកស្រះស្លាប់យ៉ាងអណោចអធ័ម គ្រាដែលបុរសរូបនេះរាយខ្សែភ្លើងតភ្ជាប់ចរន្តអគ្គិសនីចូលម៉ូទ័របូមទឹក ដើម្បីបូមទឹកដាក់ដំណាំពោត កាលពីវេលាម៉ោង១៧ និង១៥នាទី ថ្ងៃទី២១ ខែមីនា ឆ្នាំ២០១៧ ស្ថិតក្នុងភូមិកំពង់ទ្រា ឃុំស្អាងភ្នំ ស្រុកស្អាង ខេត្តកណ្តាល ។
មន្ត្រីនគរបាលស្រុកស្អាងបានឲ្យដឹងថា ជនរងគ្រោះស្លាប់បាត់បង់ជីវិតនោះឈ្មោះ កុល ណើ ភេទប្រុស អាយុ៦០ឆ្នាំ ជនជាតិខ្មែរ មុខរបរ កសិករ មានទីលំនៅក្នុងភូមិកំពង់ទ្រា ឃុំស្អាងភ្នំ ស្រុកស្អាង ។
ប្រភពដដែលបានបន្តថា នៅមុនពេលកើតហេតុជនរងគ្រោះបានយកខ្សែភ្លើងទៅរាយចេញពីក្នុងផ្ទះឆ្ពោះទៅមាត់ស្រះខាងក្រោយផ្ទះតភ្ជាប់ជាមួយម៉ូទ័របូមទឹក ដើម្បីបូមទឹកស្រោចស្រប់ផលដំណាំពោត ខណៈកំពុងដោតឌុយជាមួយព្រីភ្លើងបណ្តាលឲ្យឆ្លងចរន្តឆក់ជនរងគ្រោះធ្លាក់ចូលទៅក្នុងទឹកស្រះស្លាប់យ៉ាងអណោចអធ័មតែម្តង ។
សាកសពជនរងគ្រោះត្រូវបានកូនស្រីប្រទះឃើញ ក៏រត់ទៅដកឌុយខ្សែភ្លើងស្រែកអោយអ្នកជិតខាងជួយស្រង់សាកសពបុរសជាឪពុក ដើម្បីចាត់ចែងធ្វើបុណ្យតាមប្រពៃណី ៕ស្អាងជ័យ
