សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: កម្លាំងនគរបាលប៉ុស្តិ៍ជ្រោយចង្វា បានតាមប្រមាញ់ចោរកាច់ ក ម៉ូតូពីរនាក់ដែលតែងធ្វើសកម្មភាព នៅក្នុងសង្កាត់ជ្រោយចង្វា និង ព្រែកលៀប ខណ្ឌជ្រោយ ជាញឹកញាប់មិនដែលអ្នកណាចាប់បាន តែយប់ថ្ងៃថ្ងៃកើតហេតុ ដោយសារតែប្រជាពលរដ្ឋ សហការជាមួយសមត្ថកិច្ចខាងលើ ទើបបង្រ្កាបបាន។
ការបង្រ្កាបចោរកាច់កម៉ូតូពីរនាក់ខាងលើនេះបានប្រព្រឹត្តទៅ កាលពីវេលាម៉ោង០០និង១០នាទី រំលងអធ្រាត្រឈានចូលថ្ងៃទី ២៥ ខែមីនា ឆ្នាំ២០១៧ ស្ថិតនៅចំណុចផ្លូវកែវចិន្តា ក្នុងភូមិ៣ សង្កាត់ជ្រោយចង្វា ខណ្ឌជ្រោយចង្វា បន្ទាប់ពីពួកគេកំពុងធ្វើសកម្មភាពកាច់កម៉ូតូហើយត្រូវបានប្រជាពលរដ្ឋនិងសមត្ថកិច្ចដេញតាមចាប់ខ្លួនបាននៅចំណុចក្បែរសណ្ឋាគារសុខាភ្នំពេញ ឲ្យពួកគេក្រាបនឹងថ្នល់។
សមត្ថកិច្ចបានឲ្យដឹងថាជនសង្ស័យទាំង២នាក់ដែលឃាត់ខ្លួននេះ ទី១ឈ្មោះ ខំ សាក់ ភេទប្រុស អាយុ២៩ឆ្នាំ មុខរបរមិនពិតប្រាកដ និងជនសង្ស័យទី២ឈ្មោះ វេញ វីរ: ភេទប្រុស អាយុ៣០ឆ្នាំ មុខរបរមិនពិតប្រាកដ។ ជាមួយនេះដែរសមត្ថកិច្ចដកហូតបានវត្ថុតាងសម្ភារ:សម្រាប់កាច់ក ម៉ូតូមួយចំនួន មានដែកអក្សរតេ មួយ កូនសោលេខ១០មួយ និងឧបករណ៍ជាច្រើនទៀត ។
បច្ចុប្បន្នជនសង្ស័យធ្វើសកម្មភាពកាច់សោកមូតូទាំង២នាក់នេះ ត្រូវបានកម្លាំងនគរបាលប៉ុស្ដិ៍ជ្រោយចង្វានាំយកទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងចាត់ការតាមនីតិវិធី ៕ ប្រាថ្នា
