មេដឹកនាំក្រុមបាតុករប្រឆាំងនៅរុស្ស៊ី Alexei Navalny ជាប់ឃុំ១៥ថ្ងៃ

មេដឹកនាំប្រឆាំងរុស្ស៊ី លោក Alexei Navalny ត្រូវជាប់ឃុំរយៈពេល១៥ថ្ងៃពីបទទទឹងទទែងរឹងរូសបទបញ្ជារបស់ប៉ូលិសអំឡុងធ្វើមហាបាតុកម្មកាលពីថ្ងៃទីអាទិត្យកន្លងទៅនេះ ។

លោកជាមនុស្សម្នាក់ ក្នុងចំណោមច្រើនរយនាក់ទៀតដែលត្រូវឃុំខ្លួនពាក់ព័ន្ធការប្រមូលផ្តុំជួបជុំគ្នានៅទូទាំងប្រទេសរុស្ស៊ីនោះ ។

តុលាការក្រុងមូស្គូ មុនដំបូងបានពិន័យមេដឹកនាំប្រឆាំងរូបនេះជាទឹកប្រាក់ប្រមាណ៣៥០ដុល្លារដោយសារបាតុកម្មគ្មានច្បាប់ ។ ថ្ងៃទី២៧ ខែមីនា រដ្ឋាភិបាលរុស្ស៊ីចោទប្រកាន់គណបក្សប្រឆាំងពីបទជំរុញឲ្យមានការរំលោភបំពានច្បាប់ និងញុះញង់ឲ្យកើតមានអំពើហិង្សា ។

មេដឹកនាំប្រឆាំងធ្វើបាតុកម្មស្រែកចោទប្រកាន់នាយករដ្ឋមន្ត្រីរុស្ស៊ី លោក Dmitry Medvedev ប្រព្រឹត្តអំពើពុករលួយ ។ ពលរដ្ឋរាប់ពាន់នាក់នៅទូទាំងប្រទេសរុស្ស៊ី ក្នុងនោះមាននៅក្នុងទីក្រុងសំខាន់ៗ ដូចជាទីក្រុង St Petersburg, Vladivostok, Novosibirsk, Tomsk និងច្រើនផ្សេងទៀតនាំគ្នាធ្វើបាតុកម្មប្រឆាំងអំពើពុករលួយនេះ ។

ប៉ូលិសរុស្ស៊ីអះអាងថា ចាប់ខ្លួនបាតុករ៥០០នាក់ ប៉ុន្តែក្រុមសិទ្ធិមនុស្សថ្លែងថា ១០៣០នាក់ត្រូវបានចាប់ខ្លួននៅមូស្គូ ហើយយ៉ាងតិច១២០នាក់ទៀត មិនទាន់ត្រូវបានដោះលែងនៅឡើយទេ ៕

មេដឹកនាំក្រុមបាតុករប្រឆាំងនៅរុស្ស៊ី Alexei Navalny

រូបត្លុកនាយករដ្ឋមន្ត្រីរុស្ស៊ី ដែលបាតុករថា ប្រព្រឹត្តពុករលួយ