សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យប្រុស ស្រី៤នាក់ ត្រូវកម្លាំងព្រហ្មទណ្ឌខណ្ឌសែនសុខ សហការណ៍ជាមួយនគរបាលប៉ុស្តិ៍ភ្នំពេញថ្មីឃាត់ខ្លួន ចោទពីបទមុខសញ្ញាជួញដូរគ្រឿងញៀន និងចាប់យកថ្នាំក្រាមពណ៌ថ្លាស២កញ្ចប់ រួមនឹងវត្ថុតាងល្មើសមួយចំនួន ។
ករណីឃាត់ខ្លួនជនសង្ស័យប្រុសស្រីទាំង៤នាក់នេះ ធ្វើឡើងនៅចំណុចផ្លូវលេខ១០០៣ កែងលេខ១៩៧០ ភូមិពោងពាយ សង្កាត់ភ្នំពេញថ្មី កាលពីម៉ោង១៣និង៣០នាទីរ ថ្ងៃទី២៧ ខែមីនា ឆ្នាំ២០១៧ ដកហូតបានថ្នាំញៀនចំនួន២កញ្ចប់ ហើយសមត្ថកិច្ចបាននាំខ្លួនជនទាំងនេះទៅឆែកឆេរផ្ទះនៅភូមិគោកឃ្លាង សង្កាត់ភ្នំពេញថ្មី ក៏ឃាត់ខ្លួនបានស្ត្រី២នាក់បន្ថែមទៀត ។
សមត្ថកិច្ចបញ្ជាក់ថា ជនសង្ស័យទី១ឈ្មោះ យ៉ែម វាសនា ភេទប្រុស អាយុ២៣ឆ្នាំ មុខរបរមិនពិត ស្នាក់ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ទី២ឈ្មោះ យ៉ែម សុខនី ភេទប្រុស អាយុ២៧ឆ្នាំ មុខរបរមិនពិត ស្នាក់ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ទី៣ ឈ្មោះរិទ្ធី ណាវី ភេទស្រី អាយុ១៨ឆ្នាំ មុខរបរមិនពិត និងទី៤ឈ្មោះ រិទ្ធី ស្រីពៅ អាយុ១៨ឆ្នាំ មុខរបរមិនពិត (ទាំង៤នាក់ខាងលើនេះជាប្តីប្រពន្ធ ដោយបងយកបង ប្អូនយកប្អូន) ។
សមត្ថកិច្ចបានប្រាប់ថា ជនសង្ស័យខាងលើជាមុខសញ្ញាចាស់គាស់ផ្ទះ និងជួញដូរគ្រឿងញៀនដែលកម្លាំងសមត្ថកិច្ចកំពុងតាមប្រមាញ់ លុះនៅម៉ោងខាងលើ ស្រាប់តែបានឃើញជិះម៉ូតូឃ្លីក ពណ៌សលាយត្រូយចេក ឌុបគ្នាក៏ឃាត់ខ្លួន និងពិនិត្យជាប់ខ្លួនឃើញថ្នាំញៀនប្រភេទក្រាមសថ្លាចំនួន២កញ្ចប់តូច ក៏នាំខ្លួនទៅអធិការដ្ឋាននគរបាលខណ្ឌសែនសុខ ដើម្បីសាកសួរ ហើយបានបន្តនាំទៅឆែកឆេរផ្ទះនៅភូមិគោកឃ្លាង សង្កាត់ភ្នំពេញថ្មី ជាលិទ្ធផលឃាត់ខ្លួនស្ត្រី២នាក់ទៀត ដែលជាប្រពន្ធជនទាំង២នាក់ ដោយដកហូតដាវសាំម៉ូរៃមួយដើម សម្ភារគាស់ផ្ទះមួយចំនួនធំ និងឧបករណ៍ប្រើប្រាស់គ្រឿងញៀនមួយចំនួន ។
សមត្ថកិច្ចបានបន្តថា ជនសង្ស័យប្រុសស្រីទាំង៤នាក់ ពេលឃាត់ហើយយកមកធ្វើតេស្តិ៍ទឹកនោមឃើញថា មានផ្ទុកសារធាតុញៀនទាំង៤នាក់តែម្តង ហើយឃាត់ខ្លួនបណ្តោះអាសន្នរង់ចាំកសាងសំណុំរឿងបញ្ជូនទៅសាលាដំបូងរាជធានីភ្នំពេញពេលក្រោយ ៕ តុង សីហា
