សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលប៉ុស្តិ៍ទឹកល្អក់ទី១ ខណ្ឌទួលគោក បានធ្វើការឃាត់ខ្លួន យុវសិស្ស២នាក់ ម្នាក់រៀនថ្នាក់ទី១១F1 នៃវិទ្យាល័យ ជា ស៊ីម សន្ធរម៉ុកនិងម្នាក់ថ្នាក់ទី១២ នៃវិទ្យាល័យ «ជា ស៊ីម សាមគ្គី» បន្ទាប់ពីពួកគេបានបែកគំនិតឆក់ទូរស័ព្ទដៃពីនារីម្នាក់ ជាបុគ្គលិកក្រុមហ៊ុន Manu life បានសម្រេចហើយ ព្យាយាមបើកម៉ូតូរត់គេចខ្លួន ប៉ុន្តែគេចមិនផុតពីកម្លាំងសមត្ថកិច្ចល្បាតតាមក្របួចជាប់តែម្តង ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង៣រសៀលថ្ងៃទី២៨ ខែមីនា ឆ្នាំ២០១៧ នៅចំណុច ផ្លូវលេខ២៦១ កែងផ្លូវលេខ១២២ ក្រុមទី៣៣ ភូមិ៩ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
សមត្ថកិច្ចឲ្យដឹងថា ជនសង្ស័យទាំង២នាក់ដែលត្រូវសមត្ថកិច្ចឃាត់ខ្លួន នោះ ៖ ទី១-ឈ្មោះ សៀង សំណាងរិទ្ធី ហៅហេង អាយុ១៧ឆ្នាំ មុខរបរ សិស្សថ្នាក់ទី11A2 វិទ្យាល័យ ជា ស៊ីម សាមគ្គី ស្នាក់នៅផ្ទះពុំចាំលេខ ផ្លូវលំ សង្កាត់ចោមចៅ ខណ្ឌពោធិសែនជ័យ និងទី២-ឈ្មោះ ស៊ុត សុដារាណ ហៅ រាណ អាយុ១៧ឆ្នាំ មុខរបរសិស្សថ្នាក់ទី១១F1 វិទ្យាល័យ ជា ស៊ីម សន្ធរម៉ុក ស្នាក់នៅផ្ទះលេខ9B ផ្លូវលេខ៣៧១ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ចំណែកឯនារីរងគ្រោះឈ្មោះ យស ធាយ៉ា អាយុ២៦ឆ្នាំ មុខរបរបុគ្គលិកក្រុមហ៊ុន Manu life ស្នាក់នៅផ្ទះលេខ១១៣ ផ្លូវលេខ១១ ពិភពថ្មីវេងស្រេង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។
តាមប្រភពព័ត៌មានពីមន្រ្តីនគរបាលខណ្ឌទួលគោក បានឲ្យដឹងថា នៅមុនពេលកើតហេតុ នារីរងគ្រោះបានជិះម៉ូតូមួយគ្រឿងម៉ាក Honda Scoopy ពណ៌ស ពាក់ស្លាកលេខភ្នំពេញ 1CK-3979 ដោយទុកទូរស័ព្ទដៃមួយគ្រឿងម៉ាក់សាំសុងក្នុងឃ្លុបម៉ូតូខាងមុខ លុះជិះមកដល់ចំណុចកើតហេតុ ស្រាប់តែលិចមុខជនសង្ស័យ២នាក់ បានជិះម៉ូតូម៉ាក Honda Click ពណ៌ស ស៊េរី 2015 ពាក់ស្លាកលេខភ្នំពេញ 1FB-7552 តាមពីក្រោយអែបខាងស្តាំហើយ ធ្វើសកម្មភាពឆក់យកទូរស័ព្ទដៃពីក្នុង ឃ្លុបម៉ូតូបានសម្រេច រួចព្យាយាមជិះម៉ូតូគេចខ្លួន ក៏បានប៉ះ ជាមួយម៉ូតូអ្នកដំណើរតាមផ្លូវ បណ្តាលឲ្យយដួលម៉ូតូ ភ្លាមនោះកម្លាំងសមត្ថកិច្ចកំពុងល្បាតនៅក្បែរកន្លែងកើតហេតុក៏អន្តរាគមន៍ឃាត់ខ្លួនតែម្តង ។ក្រោយឃាត់ខ្លួនជនសង្ស័យវត្ថុតាងចាប់យករួមមាន៖ ទូរស័ព្ទមួយគ្រឿងម៉ាក់សាំសុងរបស់ជនរងគ្រោះ រួចក៏បានប្រគល់ឲ្យយជនរងគ្រោះវិញផងដែរ ។
បច្ចុប្បន្នជនសង្ស័យទាំង២នាក់ ត្រូវបានឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅតុលាការចាត់ការតាមនីតិវិធី ៕ស តារា
