សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវនារីរូបស្រស់២នាក់ស្រវឹងស្រាបានបើករថយន្តក្នុងល្បឿនលឿន រេចង្កូតជ្រុលទៅបុកនឹងរបាំងថ្មពុះចែកទ្រូងផ្លូវ រួមទាំងឡើងគងពីលើទ្រូងផ្លូវរងការខូចខាត ហើយស្របពេលនោះរបាំងថ្ម ក៏បានខ្ទាតទៅប៉ះរថយន្តមួយគ្រឿងទៀតដែលធ្វើដំណើរបញ្ច្រាសគ្នារងការខូចខាតបន្តិចបន្ទួច ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៩និង១០នាទីយប់ ថ្ងៃទី៤ ខែមេសា ឆ្នាំ២០១៧ នៅត្រង់ចំណុចមុខផ្សារទំនើប អុីន អន តាមបណ្ដោយផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន ។
យោងតាមសម្ដីប្រជាពលរដ្ឋដែលនៅក្បែរកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គឺរថយន្តបង្កម៉ាក ហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ2AE.3941 ដែលបើកបរ និងអ្នករួមដំណើរដោយយុវនារី២នាក់ ហើយស្រវឹងស្រា បានធ្វើដំណើតាមបណ្ដោយផ្លូវសុធារស ទិសដៅពីជើងទៅត្បួង ក្នុងល្បឿនលឿន ខណៈមកដល់ចំណុចកើតហេតុខាងលើ ក៏រេចង្កូតជ្រុលទៅបុកនិងរបាំងថ្មពុះចែកទ្រូងផ្លូវ រួមទាំងឡើងគងពីលើទ្រូងផ្លូវរងការខូចខាត ហើយស្របពេលនោះរបាំងថ្មក៏បានខ្ទាតទៅប៉ះរថយន្តមួយគ្រឿងទៀតម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ កណ្ដាល 2A.7288 ដែលបើកបរដោយនារីម្នាក់ បានធ្វើដំណើរបញ្ច្រាស់គ្នា បណ្ដាលឲ្យរងការខូចខាតបន្តិចបន្ទួច សំណាងល្អក្នុងហេតុការណ៍ខាងលើ មិនបង្កគ្រោះថ្នាក់ដល់មនុស្សណាម្នាក់នោះឡើយ ។
បន្ទាប់ពីកើតហេតុ ភាគីខាងរថយន្តរងគ្រោះមិនបានរង់ចាំទាមទារថ្លៃខូចខាតនោះទេ ព្រោះមិនចង់មានរឿងវែងឆ្ងាយ ដោយបើករថយន្តចូលផ្សារទំនើប អ៊ីន អន ទៅបាត់ ។ ចំណែកឯរថយន្តបង្ក ត្រូវបានសមត្ថកិច្ចមូលដ្ឋានទំនាក់ទំនងទៅជំនាញចរាចរណ៍ជើងគោករាជធានីភ្នំពេញ ឲ្យចុះមកវាស់វែង យកទៅរក្សាទុក រងចាំដោះស្រាយគ្នាតាមផ្លូវច្បាប់នៅពេលក្រោយ ៕ ភារ៉ា ដង្កោ
