សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រឿងក្ដីលោកហុង សុខហួរ អតីតសមាជិកព្រឹទ្ធសភាគណបក្សសម រង្ស៊ី ត្រូវបានពន្យារពេលដោយសារតែអវត្តមានមេធាវី ព្រោះរឿងព្រហ្មទណ្ឌហើយជាបទល្មើសឧក្រិដ្ឋ ត្រូវតែមានវត្តមានមេធាវីដាច់ខាត ពោលគឺមិនមែនមកពីពាក្យសុំពន្យារពេលរបស់ក្រុមមេធាវីនោះទេ ។ នេះបើតាមការបញ្ជាក់របស់អ្នកនាំពាក្យសាលាឧទ្ធរណ៍ ។
កាលពីថ្ងៃទី៧ ខែមេសា ឆ្នាំ២០១៧ សាលាឧទ្ធរណ៍ សម្រេចពន្យារពេលសវនាការរឿងក្ដីលោក ហុង សុខហួរ ទៅថ្ងៃក្រោយវិញ ដោយសារគ្មានវត្តមានមេធាវី ។
មេធាវីមួយរូបការពារក្ដីលោកហុង សុខហួរ លោកស្រី ម៉េង សុភារី គឺបញ្ជាក់ថា ក្រុមមេធាវីបានដាក់ពាក្យសុំពន្យារពេល ដោយសារតែមេធាវីពីររូបផ្សេងទៀតជាប់រវល់ ។
ពាក់ព័ន្ធបញ្ហានេះ អគ្គលេខាធិការរងសាលាឧទ្ធរណ៍ និងជាអ្នកនាំពាក្យ លោក ទូច ថារិទ្ធិ បញ្ជាក់នៅថ្ងៃទី៨ ខែមេសា ថា រឿងក្ដីលោក ហុង សុខហួរ ជម្រះអត់កេីតទេដោយពុំមានមេធាវី ជនជាប់ចោទចូលរួមនីតិវិធី ។ មិនអាចជម្រះបានទេក្នុងរឿងព្រហ្មទណ្ឌ ។
លោកបន្ថែមថា ការពន្យារពេលនេះ ពុំមែនមូលហេតុពាក្យសុំពន្យារពេលរបស់ក្រុមមេធាវីការពារក្ដីលោកហុង សុខហួរ ឡើយ ។
ក្រមនីតិវិធីព្រហ្មទណ្ឌ ត្រង់មាត្រា៣០១ ចែងថា ” ជំនួយពីមេធាវីត្រូវតែមានដាច់ខាតក្នុងករណី បទឧក្រិដ្ឋ ” ។
គួររំលឹកថា លោក ហុងសុខហួរ ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគាររយៈពេល៧ឆ្នាំ ពីបទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និង បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលចែងឲ្យផ្ដន្ទាទោសតាមមាត្រា ៦២៩ មាត្រា ៦៣០ មាត្រា ៤៩៤ និងមាត្រា៤៩៥នៃក្រមព្រហ្មទណ្ឌ ពាក់ព័ន្ធការក្លែងសន្ធិសញ្ញាព្រំដែនកម្ពុជា វៀតណាម ឆ្នាំ១៩៧៩ ត្រង់មាត្រា៤ រួចយកឯកសារក្លែងនេះ ទៅបង្ហោះក្នុងផេកហ្វេសប៊ុករបស់ លោក សម រង្ស៊ី ដែលជាដើមចមនាំឲ្យតុលាការចោទប្រកាន់ លោក សម រង្ស៊ី ពីបទសមគំនិតក្នុងបទល្មើសនេះ ៕ ចេស្តា
