សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ បុរសម្នាក់បានស្លាប់យ៉ាងអណោចអធ័ម ខណៈជិះម៉ូតូទៅបុកក្របីដើរឆ្លងថ្នល់ និងបណ្តាលឲ្យក្របីរបួសធ្ងន់ ហើយម៉ូតូខូចស្ទើរទាំងស្រុង ដែលហេតុការណ៍នេះបានកើតឡើងកាលពីវេលាម៉ោង៩យប់ ថ្ងៃទី១០ ខែមេសា ឆ្នាំ២០១៧ នៅលើកំណាត់ផ្លូវជាតិលេខ៩ ចំណុចភូមិអូរត្រែល ឃុំថាឡា ស្រុកថាឡាបរិវាត់ ខេត្តស្ទឹងត្រែង។
លោក អ៊ីវ លឿ អធិការរងស្រុថាឡាបរិវ៉ាត់បានឲ្យដឹងថា ជនរងគ្រោះដែលជិះម៉ូតូបុកក្របីស្លាប់ឈ្មោះ អឿន ថាន់ដេត ភេទប្រុស អាយុ២១ឆ្នាំ រស់នៅភូមិពងទឹក ឃុំអូរី ស្រុកថាឡាបរិវ៉ាត់។ ជនរងគ្រោះជិះម៉ូតូម៉ាកហុងដា ពាក់ស្លាកលេខ ញ.5057 ភ.ព1 ។ មុនពេលកើតហេតុ ជនរងគ្រោះបានធ្វើដំណើរពីជើងទៅត្បូង ហើយក៏បានវាក់នឹងសត្វក្របីដើរឆ្លងថ្នល់បុកពេញទំហឹង ខណៈដែលជនរងគ្រោះជិះលឿន ហើយនៅចំណុចកើតហេតុងងឹតផង។
បច្ចុប្បន្នសាកសពជនរងគ្រោះត្រូវបានក្រុមគ្រួសារដឹកបញ្ជូនទៅលំនៅដ្ឋានដើម្បីធ្វើបុណ្យ រីឯសត្វក្របីដែលរបួស នគរបាលបានយកទៅទុកនៅប៉ុស្តិ៍ឃុំថាឡា ជាមួយនឹងម៉ូតូជនរងគ្រោះដើម្បីស្រាវជ្រាវរកម្ចាស់ក្របីចាត់ការតាមផ្លូវច្បាប់។
លោកអធិការរងបានឲ្យដឹងដែរថា នៅថ្ងៃខាងលើ មានករណីគ្រោះថ្នាក់ចរាចរណ៍៤ករណីផ្សេងទៀតនៅក្នុងស្រុកថាឡាបិវ៉ាត់ រវាងម៉ូតូនឹងម៉ូតូ ម៉ូតូនឹងគោយន្ត បណ្តាលឲ្យមនុស្ស៥-៦នាក់រងរបួសធ្ងន់ និងស្រាល។ ករណីគ្រោះថ្នាក់ចរាចរណ៍ទាំងអស់នេះផ្តើចេញពីកត្តាមនុស្សបើកបរមិនគោរពច្បាប់ចរាចរណ៍ និងបើកបរក្រោយពេលហូបគ្រឿងសស្រវឹង៕ មាស សុផាត
