សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: កម្លាំងនគរបាលប៉ុស្តិ៍ទន្លេបាសាក់បានចាប់ឃាត់ខ្លួនបុរសម្នាក់តាមពាក្យបណ្តឹងជនរងគ្រោះ ក្រោយពីរូបគេបានខ្ចីម៉ូតូម៉ាកហុងដាសេ១២៥ មួយគ្រឿងពីមិត្តភក្តិម្នាក់ថាជិះទៅដើរលេងមួយភ្លែត តែបែរជាយកទៅបញ្ចាំបានលុយចំនួន៥០០ដុល្លារ ចូលកាស៊ីណូលេងល្បែងចាញ់អស់គ្មានសល់ហើយបម្រុងគេចខ្លួន។
ការឃាត់ខ្លូនបុរសម្នាក់ធ្វើឡើងកាលពីវេលាម៉ោង ៩ ព្រឹក ថ្ងៃទី១៨ ខែមេសា ឆ្នាំ ២០១៧ នៅផ្ទះសំណាក់ តាយហេង ផ្លូវសុធារស ក្នុងសង្កាត់ទន្លេបាសាក់ ខណ្ឌចំការមន ។
មន្ត្រីនគរបាលប៉ុស្តិ៍ទន្លេបាសាក់ម្នាក់បានឲ្យដឹងថា ជនសង្ស័យដែលឃាត់ខ្លួនបានមានឈ្មោះ ឡាយ ធីម អាយុ២៨ឆ្នាំ មុខរបរបើករថយន្តដឹកសិស្ស ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ ចំណែកជនរងគ្រោះមានឈ្មោះ ញឹប អុល ភេទប្រុស អាយុ ២៧ឆ្នាំ មុខរបរនិស្សិត ស្នាក់នៅផ្ទះជួល ក្នុងសង្កាត់ទឹកថ្លា ខណ្ឌសែនសុខ។
ជនរងគ្រោះបានប្រាប់សមត្ថកិច្ចឲ្យដឹងថា មុនពេលកើតហេតុគឺកាលពីវេលាម៉ោង ១០យប់ ថ្ងៃទី១៧ ឆ្នាំ២០១៧ កន្លងមកនេះ ជនសង្ស័យរូបនេះបានខ្ចីម៉ូតូម៉ាក ហុងដាសេ១២៥ ពណ៌ខ្មៅ ស៊េរីឆ្នាំ ២០១៣ ពាក់ស្លាកលេខកំពត1G-6750 មួយគ្រឿងពីគាត់ថា «យកជិះទៅដើរលេង»។ លុះព្រឹកឡើងជនសង្ស័យបានត្រឡប់មកវិញកាន់ផ្ទះ វិញ មិនបានឃើញម៉ូតូទើបគាត់ សួរថា «ម៉ូតូខ្ញុំទៅណា?ជនសង្ស័យឆ្លើយថា រូបគេយកទៅបញ្ចាំបានលុយ ៥០០ដុល្លារ យកទៅចូលកាស៊ីណូលេងល្បែងចាញ់អស់ហើយ» លុះពេលឮដូច្នេះគាត់ក៏ចាប់ខ្លួនយកមកប្រគល់ឲ្យកម្លាំងមានសមត្ថកិច្ចតែម្តងទៅ។
ជនសង្ស័យរូបនេះត្រូវបានកម្លាំងនគរបាលប៉ុស្តិ៍ទន្លេបាសាក់ធ្វើកំណត់ហេតុបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ដើម្បីចាត់ការតាមច្បាប់ជាបន្ត៕ ប្រាថ្នា
