សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ សមត្ថកិច្ច សហការគ្នាឃាត់ខ្លួនប្តីប្រពន្ធ២នាក់ ដោយជាប់សង្ស័យជាអ្នកបញ្ជាផ្ទាល់ឲ្យកូនប្រុសចំនួន ៣នាក់ ហែករបងចូលកាប់ចិញ្ច្រាំលើជនរងគ្រោះ ឥតប្រណីដៃយ៉ាងឃោឃៅព្រៃផ្សៃជាទីបំផុតរកអ្វីព្រាបបាននោះ បណ្ដាលឲ្យជនរងគ្រោះដេកដួលប្រកាច់ស្លាប់ក្នុងថ្លុកឈាមយ៉ាងរន្ធត់ភ្លាមៗ ។
ហេតុការណ៍ខាងលើបានបង្កការភ្ញាក់ផ្អើលឡើងកាលពីវេលាម៉ោង១៨ និង៤០នាទី ថ្ងៃទី១៨ ខែមេសា ឆ្នាំ២០១៧ ត្រង់ចំណុចផ្ទះជនរងគ្រោះ(ស្លាប់)ឈ្មោះ ធូ សាម៉េត ភេទប្រុស អាយុ ៣៩ឆ្នាំ សញ្ជាតិខ្មែរ ស្ថិតក្នុងភូមិទទឹង ឃុំក្បាលត្រាច ស្រុកក្រគរ ខេត្តពោធិ៍សាត់។
ករណីខាងលើនេះ លោកវរសេនីយ៍ត្រី ឯម រុនអធិការនគរបាលស្រុកក្រគរបានឲ្យដឹងថា បញ្ហាខាងលើបង្កឡើងដោយជនសង្ស័យជាឃាតកចំនួន ៣នាក់បងប្អូនបង្កើតនឹងគ្នា ទី១ ឈ្មោះ រ៉ែន រី ភេទប្រុស អាយុ ២៩ឆ្នាំ សញ្ជាតិខ្មែរ ទី២ ឈ្មោះ រ៉ែន រ៉ា ភេទប្រុស អាយុ ២៧ឆ្នាំ សញ្ជាតិខ្មែរ និងទី៣ ឈ្មោះ រ៉ែន រ៉ូ ភេទប្រុស អាយុ ២៥ឆ្នាំ សញ្ជាតិខ្មែរ ជនសង្ស័យទាំង ៣នាក់ ជាបងប្អូនបង្កើតនឹងគ្នា មានទីលំភូមិ-ឃុំកើតហេតុខាងលើ ជាប់ព្រំដីផ្ទះជាមួយជនរងគ្រោះស្លាប់(ធូ សាម៉េត) ហើយជនសង្ស័យទាំងនេះបានធ្វើសកម្មភាពហែករបងចូលកាប់លើជនរងគ្រោះយ៉ាងឃោឃៅដល់ក្នុងផ្ទះ ដោយសារទំនាស់ព្រំដីជាប់គ្នា រួចនាំគ្នាគេចខ្លួនបាត់ស្រមោលអស់។
លោក វរសេនីយ៍ត្រីបន្តថា ទោសយ៉ាងណាក្តីជនសង្ស័យជាឃាតកទាំងបីនាក់បងប្អូនរូបនេះ មិនអាចគេចផុតពីសំណាញ់ច្បាប់បានជាដាច់ខាត់ ព្រោះកម្លាំងសមត្ថកិច្ចស្ថាប័នពាក់ព័ន្ធរបស់យើងបានសហការគ្នាយ៉ាងស្អិតរមួត ដាក់ពង្រាយគ្រប់ច្រកល្ហកគ្រប់ទិសទីមិនថាតាមបណ្ដាព្រំដែននោះទេ។
លោក អធិការនគរបាលស្រុកក្រគរបន្តទៀតថា ដោយទទួលបានបទបញ្ជាពីថ្នាក់ដឹកនាំ នាព្រឹកថ្ងៃទី១៩ ខែមេសា ឆ្នាំ២០១៧ កម្លាំងបានឃាត់ខ្លួនប្តីប្រពន្ធត្រូវជាឪពុកម្ដាយ ជនសង្ស័យជាឃាតក(កូន)ទាំង ៣នាក់ ដោយប្តីបានចូលបញ្ជាកូនៗដល់ក្រោមផ្ទះជនរងគ្រោះ ចំណែកប្រពន្ធបានស្រែកបញ្ជាពីខាងក្រៅរបងថែមទៀត ។ នេះបើតាមការបញ្ជាក់ពីសាក្សីរស់ក្រុមគ្រួសារជនរងគ្រោះ។
លោក បញ្ជាក់បន្ថែមបន្តទៀតថា ប្តីប្រពន្ធត្រូវបានកម្លាំងឃាត់ខ្លួនឈ្មោះ កែម សារ៉ែន ភេទប្រុស អាយុ ៥២ឆ្នាំ សញ្ជាតិខ្មែរ និងប្រពន្ធឈ្មោះ ប្រឹម ខន អាយុ ៥០ឆ្នាំ សញ្ជាតិខ្មែរ បច្ចុប្បន្ន រស់នៅភូមិ ឃុំកើតហេតុខាងលើ ប្តីប្រពន្ធរូបនេះកំពុងបំពេញនីតិវិធីនៅ អធិការដ្ឋាននគរបាលស្រុកក្រគរ ដើម្បីបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តពោធិ៍សាត់ចាត់ការបន្ត ៕ ប៉ឹម ពិន
ឪពុក ម្តាយ សង្ស័យជាអ្នកបញ្ជាផ្ទាល់ឲ្យកូនៗ៣នាក់ទៅកាប់សម្លាប់ជនរងគ្រោះដល់ផ្ទះ
ជនសង្ស័យជាឃាតក
ជនសង្ស័យជាឃាតក
