សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ បើករថយន្តព្រូស១គ្រឿង ខណៈភ័យស្លន់ស្លោគេចពីក្មេងស្ទាវពាល១ក្រុមជិះម៉ូតូដេញពីក្រោយ ព្រមទាំងមានរថយន្ត១គ្រឿងទៀត បណ្ដាលឲ្យរេចង្កូតធ្លាក់ចូលប្រឡាយក្រឡាប់ផ្ងារជើងច្រងាង ។
ហេតុការណ៍នេះ កើតឡើងនៅវេលាម៉ោង១១និង៣០នាទីយប់ ថ្ងៃទី២៧ ខែមេសា ឆ្នាំ២០១៧ ស្ថិតនៅតាមបណ្ដោយផ្លូវបេតុងព្រៃសរ ភូមិរការ សង្កាត់ព្រៃសរ ខណ្ឌដង្កោ ។
យោងតាមព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់ បើករថយន្តព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2.AC0449 បើកពីកើតទៅលិច ក្នុងល្បឿនមធ្យម ខណៈមកដល់ចំណុចកើតហេតុខាងលើ ស្រាប់តែមានស្ទាវពាល១ក្រុម ជិះម៉ូតូ៥គ្រឿងប្រហែល១០នាក់ និងមានរថយន្តឡិចស៊ីស៣៣០មួយគ្រឿងទៀត មិនចាំស្លាកលេខ ដេញពីក្រោយបើកមកកៀរបណ្ដាលឲ្យរថយន្តធ្លាក់ចូលប្រឡាយក្រឡាប់ផ្ងារជើងឡើងច្រងាង ខណៈនោះម្ចាស់រថយន្តមិនបានចេញពីក្នុងរថយន្តនោះទេ ត្រូវក្រុមស្ទាវទាំងនោះយកដុំថ្មមកគប់រថយន្តបណ្ដាលរងការខូចខាត បែកកញ្ចក់ខាងក្រោយខ្ទេច ។ ក្រោយពីធ្វើសកម្មភាពរួចហើយ ក្រុមស្ទាវពាលទាំងអស់នោះបានបើកម៉ូតូ និងរថយន្តគេចខ្លួនបាត់ស្រមោល។
ម្ចាស់រថយន្តដឹងថា ក្រុមស្ទាវពាលទាំងនោះទៅអស់ហើយ ក៏បានលូនចេញពីរថយន្តមកខាងក្រៅហើយកមានបងប្អូននៅទីនោះមកចោមរោមមើល។
សមត្ថកិច្ចមូលដ្ឋានបានចុះមកដល់កន្លែងកើតហេតុ ដោយសារមិនមានអ្នករបួសហើយមិនបះពាល់សម្បត្តិរដ្ឋ និងអ្នកដទៃក៏អនុញ្ញាតឲ្យម្ចាស់រថយន្តរកឡានស្ទូចទៅជួសជុលខ្លួនឯង ៕ ភារ៉ា ដង្កោ
