សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ កម្មករ កម្មការនីបាននាំគ្នារត់ចេញមកខាងក្រៅ អគារ បន្ទាប់ពីមានសំលេងយ៉ាងខ្លាំង ផ្ទុះចេញពីទីតាំងឡចំហុយ និង មានផ្សែងខ្មួលឡើងទៅលើ ដែលនៅមិនឆ្ងាយប៉ុន្មានពីអគារកម្មករធ្វើការ ។ ហេតុការណ៍ដ៍ភ្ញាក់ផ្អើលនេះបានកើតឡើងកាលពីវេលាម៉ោងជាង១២ ថ្ងៃត្រង់ ថ្ងៃទី៥ ខែឧសភា ឆ្នាំ២០១៧ នៅតាម បណ្តោយផ្លូវជាតិលេខ៥ ស្ថិតនៅក្នុងឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ។
លោក ម៉ាត់ លី អធិការនគរបាលស្រុកកំពង់ត្រឡាចបានប្រាប់អោយដឹងថា ករណីផ្ទុះឡចំហុយនេះគឺបានកើតឡើង នៅក្នុងរោងចក្រតឹកហ្វុក ឡចំហុយសម្រាប់អ៊ុតខោអាវក្នុងរោងចក្រ នៅពេលផ្ទុះភ្លាមៗ ក៍បានឆេះចេញជាផ្សែងខ្មួលឡើងមកលើ ហើយពេលនោះរថយន្តពន្លត់អគ្គិភ័យរបស់អធិការដ្ឋាននគរបាលស្រុកកំពង់ត្រឡាច បានចេញទៅជួយពន្លត់ បានបាញ់ទឹកអស់ចំនួន២រថនយន្ត ធ្វើអោយស្ថានភាពបានស្ងប់ស្ងាត់ទៅវិញ មិនបានរាលដាលឆេះទៀតនោះទេ ។
លោកអធិការបានបន្តទៀតថា ករណីផ្ទុះឡចំហាយនេះ គឺបណ្តាលមកពីឆ្លងចរន្តអគ្គិសនី ប៉ុន្តែមិនបណ្តាលអោយកម្មករ កម្មការនីណាម្នាក់រងរបួសនោះទេ ដោយសារតែក្នុងពេលកើតហេតុនោះកម្មករ កម្មការនីខ្លះ បានចេញមកហូបបាយ ខ្លះនៅក្នុងអគារ និង ដោយសាទីតាំងឡចំហុយនេះនៅដាច់ពីអគារធ្វើការរបស់កម្មករ កម្មការនី ។
ចំណែកឯកលផក ពៅ ស៊ី ថា ប្រធានមន្ទីរការងារបណ្តុះបណ្តាល និងវិជ្ជាជីវខេត្តកំពង់ឆ្នាំងបានប្រាប់ តាមទូរសព្ទ័នៅវេលាម៉ោង៣និង៤៦នាទីថ្ងៃទី០៥ឧសភា២០១៧នេះថា ករណីនេះ វាមិនមែនជាការផ្ទុះឡនៅក្នុងរោងចក្រនោះទេគឺផ្ទុះម៉ាស៊ីនភ្លើងដែលបានទុកចោលយូមកហើយនៅឆ្ងាយពីរោងចក្រខណះដែលអ្នកបច្ចេកទេសបានធ្វើការបញ្ឆេះសាកមើលហើយវាលាន់សូសម្លេងឆេះខ្លាំងរួចក៍ពន្លត់ម៉ាស៊ីនភ្លើងនោះស្រាប់តែផ្ទុះជាសម្លេងបណ្តាលអោយផ្អើលកម្មកកម្មការនីក្នុងរោងចក្រតែម្តង ។ សំណាងដែលមិនមានបង្កជាគ្រោះថ្នាក់ដល់កម្មករកម្មារនី ៕ ចន្ថា
