សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ៖ ក្រុមអាជ្ញាធរថៃ បានបញ្ជូនអ្នកទោសខ្មែរចំនួន២នាក់ ដែលជាប់ពាក់ព័ន្ធនឹងរឿងលួចឆ្លងដែនកាប់ឈើគ្រញូង មកកម្ពុជាវិញ កាលពីវេលារសៀល ថ្ងៃទី៤ ខែឧសភា ឆ្នាំ២០១៧ តាមមាត់ច្រកទ្វារអន្តរជាតិជាំស្រង៉ាំ ស្ថិតក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
អ្នកទោសខ្មែរដែលអាជ្ញាធរថៃដោះលេងឲ្យមានសិទ្ធិសេរីភាពវិញនោះ ឈ្មោះ ផល ភ័ណ្ឌ ភេទប្រុស អាយុ១៦ឆ្នាំ រស់នៅភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ត្រូវទាហានថៃចាប់ខ្លួនបាន កាលពីថ្ងៃទី១២ ខែមីនា ឆ្នាំ២០១៧។
បើតាមសម្តីអ្នកទោសខ្មែរដែលអាជ្ញាធរថៃដោះលេងនោះ បានរៀបរាប់ថា ថៅកែឈើគ្រញូង ដែលនៅក្នុងតំបន់ស្រុកអន្លង់វែង នឹងស្រុកត្រពាំងប្រាសាទ តែងតែប្រមូលកម្លាំងនៅក្នុងស្រុក ហើយបានបង្កើតជាក្រុមឲ្យឡើងភ្នំដងរ៉ែក ឆ្លងដែនចូលទៅក្នុងប្រទេសថៃរកកាប់ឈើគ្រញូងបាន យកទៅលក់ឲ្យពួកគេ ក្នុងតម្លៃថោកបំផុតគឺមួយគីឡូក្រាម ៣ ទៅ៥ដុល្លារ ទៅតាមប្រភេទឈើល្អ ឬអាក្រក់ ហើយថៅកែទាំងនោះ ក៏បានជួយឧបត្តម្ភដូចជាស្បៀងអាហារ និងលុយកាក់បន្តិចបន្ទួច ដើម្បីយកទៅបង់ឲ្យសមត្តកិច្ច ដែលឈរជើងតាមខ្សែបន្ទាត់ព្រំដែន ទើបអាចឆ្លងដែនបាន។
មន្ត្រីដែលបម្រើការងារក្នុងស្រុកអន្លង់វែងម្នាក់ សុំមិនបញ្ចេញឈ្មោះ បានឲ្យដឹងថា ទាក់ទិននឹងក្រុមអាជ្ញាធរថៃ ដែលបញ្ជូនអ្នកទោសខ្មែរប្រគល់ឲ្យក្រុមអាជ្ញាធរកម្ពុជាវិញ តាមមាត់ច្រកទ្វារអន្តរជាតិជាំ ដោយភាគច្រើនជាប់ទោសពីបទឆ្លងដែនកាប់ឈើគ្រញូង ដែលនេះជាទង្វើមួយដែលបង្កឲ្យមានការប៉ះពាល់មុខមាត់ប្រទេស និងសង្គមជាតិ នេះបើសង្កេតអ្នកដែលធ្វើឲ្យប្រទេសកម្ពុជា ទទួលរងការអាម៉ាស់បែបនេះ មានតែមនុស្ស២ទៅ៣នាក់ប៉ុណ្ណោះ នៅក្នុងស្រុកទាំង២ខាងលើ៕ ប៉ែន នួន
