សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ គោញីឈ្មោល៣ក្បាល គួរឲ្យអាណិតពន់ពេក ខណៈមេឃភ្លៀងលាយខ្យល់កន្ត្រាក់ និងរន្ទះបាញ់យ៉ាងខ្លាំង បន្ទាប់ពីកំពុងតែស៊ីស្មៅនៅវាលស្រែ អកុសសស្រាប់តែត្រូវរន្ទះបាញ់មួយឆ្វាត់លាន់ឡើងកក្រើកដីបណ្ដាលអោយសត្វគោងាប់រដូករណែលបន្តបន្ទាប់គ្នា។
ការរន្ទះបាញ់នេះបានកើតឡើងកាលពីវេលាម៉ោង៣រសៀល ថ្ងៃទី៩ ខែឧសភា ឆ្នាំ២០១៧ ស្ថិតក្នងភូមិត្រោកធំ ឃុំស្វាយធំ ស្រុកស្វាយជ្រំ ខេត្តស្វាយរៀង ។
យោងតាមអ្នកភូមិបានឲ្យដឹងថា មុនកើតហេតុ ម្ចាស់គោឈ្មោះ សុធី អាយុ៤៥ឆ្នាំ មុខរបរកសិករ មានទីលំនៅភូមិ ឃុំកើតហេតុខាងលើ ខណៈបានយកសត្វគោរបស់គាត់ទៅវាលស្រែដើម្បីស៊ីស្មៅដូចសព្វដង ប៉ុន្តែខណៈនោះ ស្រាប់តែមេឃងងឹតរកកលភ្លៀង ទើបម្ចាស់បានរត់ប្រញាប់មកផ្ទះវិញ ក្រោយមកមេឃក៏បានភ្លៀងលាយខ្យល់កន្ត្រាក់ និងមានរន្ទះបាញ់មួយឆ្វាត់ប្រមាណជិតមួយម៉ោងក៏រាំងភ្លៀង ។
ប្រភពបន្តថា ក្រោយមកទើបឃើញម្ចាស់សត្វគោមកវាលស្រែ ដើម្បីយកត្រឡប់ទៅផ្ទះវិញ ស្រាប់តែឃើញគោដេកងាប់ក្បែរគ្នាបាត់ទៅហើយ រួចក៏មានការភ្ញាក់ផ្អើលដល់អ្នកភូមិ និងសមត្ថកិច្ចមូលដ្ឋានតែម្ដង។
សូមបញ្ជាក់ថា ក្នុងរយៈមួយខែនេះខេត្តស្វាយរៀងមានករណីគ្រោះធម្មជាតិដោយរន្ទះបាញ់សត្វគោក្របីងាប់ចំនួន៩ក្បាលចំណែកមនុស្សស្លាប់ម្នាក់ផងដែរ ៕ យឹម សុថាន
