សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីវ័យក្មេងម្នាក់រត់ទៅសុំការអន្តរាមន៍ ពីនគរបាលប៉ុស្តិ៍ចោមចៅ បន្ទាប់ពីលោកប្តីប្រើអំពើហិង្សាជាញឹកញាប់ ទាមទាររករឿងតែលែងលះ ដូចជាជ្រុលហួសហេតុពេកទៅហើយ ទើបទ្រាំលែងបាន ស្នើសុំឲ្យនគរបាលជួយ កាលពីវេលាម៉ោង៤និង៥០នាទីល្ងាច ថ្ងៃទី២២ ខែឧសភា ឆ្នាំ២០១៧ ។
នារីខាងលើមានឈ្មោះ វ៉ាន់ ហួច អាយុ២៣ឆ្នាំ ជាកម្មការិនីរោងចក្រ ស្នាក់នៅផ្ទះជួលភូមិព្រៃព្រីងជើង សង្កាត់ចោមចៅ ខណ្ឌពោធិសែនជ័យ មានស្រុកកំណើត ភូមិទឹកថ្លា ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។ ចំណែកភាគីខាងប្តីមានឈ្មោះ ឈិន សុខអ៊ុល អាយុ២៣ឆ្នាំ កម្មកររោងចក្រ ។
តាមការរៀបរាប់ពីភាគីខាងស្រីបានឲ្យដឹងថា នាងត្រូវបានឪពុកម្តាយផ្សំផ្គុំឲ្យមានគូស្រករ ជាមួយបុរសខាងលើអស់រយៈពេល៣ឆ្នាំកន្លងមកហើយ រហូតមកដល់ពេលនេះមានកូនស្រីម្នាក់ជាចំណងស្នេហ៍នៃអាពាហ៍ពិពាហ៍ ។
ស្រ្តីដដែលបន្តទៀតថា ចាប់តាំងពីនាងសរសៃខ្ចី នៅក្នុងអំឡុងថ្ងៃ ខែបុណ្យចូលឆ្នាំខ្មែរ ស្រាប់តែលោកប្តីទៅលួចមានស្រីថ្មី ដើរចាកចេញបាត់ៗពីផ្ទះ មានទាំងវិចបង្វិចខោអាវទៅជាមួយទៀត ពេលចូលផ្ទះម្តងៗ តែងតែរករឿង គ្មានហេតុផល ទាមទាររកតែលែងលះ ដោយសារអំណាចនៃការងប់បល់ជាមួយស្រីផ្សេង សុខចិត្តចោលប្រពន្ធកូន ។ អស់រយៈពេលជាង៣ខែកន្លងមកនេះ ការស៊ូទ្រាំ ភាពអត់ធ្មត់ ដែលទទួលរងនូវសម្ពាធ ផ្លូវចិត្ត កម្លាំងបាយ ដោយប្តីតែងតែប្រើអំពើហិង្សា ជាញឹកញាប់ ទើបនៅល្ងាចថ្ងៃទី២២ ខែឧសភា ឆ្នាំ២០១៧ ទ្រាំលែងបាន សម្រេចដើរចូលប៉ុស្តិ៍ប៉ូលីសដើម្បីសុំការអន្តរាគមន៍ ជួយធ្វើយ៉ាងណាហៅលោកប្តី មកអប់រំទូន្មានចេញម្តង កុំឲ្យចេះតែហ៊ាន ៕ ប្រាថ្នា
