សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ តូបចំនួន១៤ ក្នុងនោះមាន៖ តូបលក់កាហ្វេ , តូប លក់ បន្លែ ,តូបដាក់ស្តុបគ្រឿងឡាន ,តូប អេតចាយ និងមានតូបមួយចំនួនទៀត ត្រូវបានអគ្គិភ័យឆេះខ្ទេចខ្ទីទាំងស្រុង ។ ហេតុការណ៍បានកើតឡើងនៅវេលាម៉ោង១០និង៤០នាទីព្រឹក ថ្ងៃទី២៤ ខែឧសភា ឆ្នាំ២០១៧ ស្ថិតនៅខាងក្រោយផ្សារសាមគ្គី ក្នុងភូមិបន្ទាយចាស់ សង្កាត់ស្លក្រាម ក្រុង/ខេត្ត សៀមរាប។
តាមប្រភពពីសាក្សីនៅកន្លែងកើតហេតុឲ្យដឹងថា ភ្លើងឆេះចេញពីតូបអ្នកស្តុបបន្លែ នៅកណ្តាលគេ រួចបន្តទៅតូបផ្សេងទៀត បណ្តាលឱ្យឆេះកាន់តែខ្លាំងទៅៗ បន្ទាប់មក ក៏បានទូរស័ព្ទ ទៅប្រាប់ម្ចាស់តូបមួយសន្ទុះ ក៏ឃើញរថយន្តពន្លត់អគ្គិភ័យរបស់សមត្ថកិច្ចមកដល់ រួចនាំគ្នាទាញទុយយោទឹក បាញ់ភ្លាមៗផងដែរ។
ម្ចាស់តូបឈ្មោះ ស៊ីវ អាន ភេទស្រី អាយុ៦១ឆ្នាំ មានមុខរបរលក់ដូរមានទីលំនៅភូមិបឹងដូនប៉ា សង្កាត់ស្លក្រាម ក្រុងសៀមរាបបានរៀបរាប់ប្រាប់សមត្ថកិច្ចថា តូបដែលជួលឱ្យគេលក់ដូរនោះមានចំនួន១៤តូប ធ្វើអំពីឈើ ប្រក់សង្ក័សី ជញ្ជាំង បាំងសង្ក័សី ក្នុងនោះ តូបដែលមានទំហំ ៤ម៉ែត្រ គុណ៧ម៉ែត្រ មានចំនួន១០តូប ក្នុងតម្លៃ៣០ដុល្លារ ក្នុង១ខែ និងតូប ៣ម៉ែត្រគុណ៧ម៉ែត្រ មានចំនួន៤តូប តែចែក ចេញជាពីម្ចាស់ តម្លៃ១០០ដុល្លារក្នុងខែ ដែលមានអ្នកជួលលក់កាហ្វេ ជាជនជាតិវៀតណាម និង អ្នកជួលតូបលក់អំពៅជាជនជាតិខ្មែរ។ អ្នកស្រីបន្តថា ការខូចខាតអស់តូប ទាំង ស្រុងនោះ គឺអស់ទឹកប្រាក់ ប្រមាណ៥០០០ដុល្លារ។
បើតាមប្រភពពីសមត្ថកិច្ចនគរបាលខេត្តបានប្រាប់ថា ក្រោយពេលកើតហេតុ មានរថយន្តពន្លត់អគ្គិភ័យរបស់នគរបាលស្នងការខេត្តចំនួន៣គ្រឿង និង រថយន្តពន្លត់អគ្គិភ័យរបស់កងរាជអាវុធហត្ថខេត្តចំនួន៣គ្រឿង ដើម្បីជួយបាញ់ពន្លត់ ខណៈពេលនោះ ភ្លើងដែលកំពុងឆេះយ៉ាងសន្ធោរសន្ធៅ នោះត្រូវបានរលត់ អស់ទាំងស្រុង នៅវេលាម៉ោង ១១ និង៤៨នាទីព្រឹក ថ្ងៃ ដដែល ។
ប្រភពបានបញ្ជាក់បន្ថែមទៀតថា ភ្លើងដែលឆេះតូបទាំងអស់នោះ មានចំនួន១៤តូប ត្រូវបានខូចខាតអស់ស្ទើរទាំងស្រុង សុទ្ធជាអ្នកជួលតូបទាំងអស់ ប៉ុន្តែគ្មាននរណាម្នាក់ រងរបួស នៅក្នុងហេតុការភ្លើងឆេះនោះឡើយ។
ប្រភពបានបញ្ជាក់ទៀតថា ការខូចខាត ទ្រព្យសម្បត្តិរបស់អ្នកជួលតូប ដោយសារភ្លើងឆេះនោះ បើគិតជាទឹកប្រាក់អស់ប្រមាណជិត៥ម៉ឺនដុល្លារ ព្រោះឥវ៉ាន់ដែលច្រើនជាងគេ គឺ គ្រឿងឡាន និង បន្លែ ៕ ប៉ុន រិទ្ធី
