សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: ពិតជាមិនធម្មតា សូម្បីក្បាលនាគចែកទ្រូងផ្លូវមានទំហំធំ និងមានទម្ងន់រាប់រយគីឡូក្រាម ក៏ត្រូវរថយន្តមួយគ្រឿងបុករបើកប៉ើងឃ្លាតពីទ្រូងផ្លូវជាង៣ម៉ែត្រមើលទៅគួរឲ្យហួសចិត្ត។
ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង៤៥នាទីព្រឹក ថ្ងៃទី២៧ ខែឧសភា ឆ្នាំ២០១៧ ស្ថិតនៅតាមបណ្តោយផ្លូវសហពន្ធ័រុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសមិនស្គាល់ ឈ្មោះម្នាក់បើករថយន្ត ម៉ាកនីសាន់ណាវ៉ារ៉ា ពណ៌សមួយគ្រឿង ពាក់ស្លាកលេខ ភ្នំពេញ 2V-1466 តាមបណ្តោយផ្លូវសហព័ន្ធរុស្ស៊ីពីកើតទៅលិច។ លុះបើកមកដល់ចំណុចកើតហេតុ ទំនងជាបុរសនេះស្រវឹង ឬងុយដេកខ្លាំងក៏រេចង្កូតរថយន្តទៅបុកក្បាលនាគចែកទ្រូងផ្លូវលាន់ ដូចរន្ទះ បណ្តាលឲ្យក្បាលនាគថ្មដែលមានទម្ងន់មិនតិចជាង៥០០គីឡូក្រាមដាច់ពីទ្រូងផ្លូវខ្ទាតទៅផ្លូវម្ខាងជាង៣ម៉ែត្រ និងធ្វើឲ្យរថយន្តខូចខាតប៉ែកខាងមុខស្ទើរទាំងស្រុងទៅមុខលែងរួចតែមិនបានបណ្តាលឲ្យនរណាម្នាក់របួសនោះទេ។
ប្រភពដដែលបានឲ្យដឹងទៀតថា បន្ទាប់ពីមានឧប្បត្តិហេតុនេះកើតឡើង ម្ចាស់រថយន្ត ទុករថយន្តចោលហើយគេចខ្លួនបាត់ ហើយក្រោយមកទើបមានកម្លាំងនគរបាលចរាចរចុះទៅដល់វាស់វែងនិងស្ទូចយករថយន្តបង្ក ទៅរក្សាទុកនៅការិយាល័យនគរបាលចរាចរណ៍ផ្លូវគោក រាជធានីភ្នំពេញ ដើម្បីដោះស្រាយគ្នាពេលក្រោយ៕ ប្រាថ្នា
