សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ ក្រោយការសាកសួរពេញមួយរសៀលថ្ងៃទី៣១ ខែឧសភា លោកស្រី ស៊ូ សុជាតា ព្រះរាជអាជ្ញារងអមសាលាដំបូងខេត្តកណ្ដាល សម្រេចដោះលែងបុរសជនជាតិចិនម្នាក់ឲ្យមានសេរីភាពឡើងវិញ ករណីបង្កគ្រោះថ្នាក់ចរាចរបណ្តាលឲ្យបុរសម្នាក់របួសធ្ងន់បញ្ជូនទៅសង្គ្រោះនៅមន្ទីរពេទ្យកាល់ម៉ែត រាជធានីភ្នំពេញ ។
ក្រុមគ្រួសារជនរងគ្រោះ អះអាងថា ខ្លួនសុខចិត្តទទួលសំណងចំនួន៤០00ដុល្លារអាមេរិក ហើយព្រមដកពាក្យបណ្ដឹង តែការសម្រេចយ៉ាងណានោះជាសមត្ថកិច្ចរបស់តុលាការ ។
អ្នកច្បាប់មួយរូប អះអាងថា ការដកពាក្យបណ្ដឹងរបស់ជនរងគ្រោះមិនអាចបញ្ចប់បណ្ដឹងអាជ្ញាបានទេ ។ មន្ត្រីតុលាការ ថ្លែងថា បើទោះជាមានដោះលែងជនសង្ស័យក៏ដោយ តែនីតិវិធីនៅដើរទៅមុខដដែល ។
នគរបាលស្រុកកៀនស្វាយ បញ្ជាក់ថា ជនសង្ស័យឈ្មោះ XIA JIN ភេទប្រុសអាយុ៣១ឆ្នាំ ជនជាតិចិន ស្នាក់នៅក្នុងរោងចក្រសួនឧស្សាហកម្ម សំរោងធំ មានមុខងារប្រធានផ្នែកត្រួតពិនិត្យសំលៀកបំពាក់ក្នុងរោងចក្រ ស្ថិតក្នុង ភូមិព្រែកត្រែង ឃុំសំរោងធំ ស្រុកកៀនស្វាយ ។
ហេតុការណ៍នេះ កើតឡើងកាលពីល្ងាចថ្ងៃទី៣០ ខែឧសភា នៅចំណុចគីឡូម៉ែត្រលេខ១៦និង១៧ ភូមិទូលក្របៅ ឃុំគគីរ ស្រុកកៀនស្វាយ ។
នគរបាលសន្និដ្ឋានថា ករណីនេះបណ្ដាលមកពីជនរងគ្រោះបើកម៉ូតូឆ្លងផ្លូវបញ្ច្រាសទិស ពីឆ្វេងមកស្ដាំខ្វះការប្រុងប្រយ័ត្ន។ ចំណែករថយន្តធ្វេសប្រហែសមិនបានមើលស្ថានភាពផ្លូវខាងមុខគ្រប់ជ្រុងជ្រោយ ៕ ចេស្តា
