សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ តាមសំណូមពររបស់ បងប្អូនប្រជាពលរដ្ឋក្នុងវេទិកាសាធារណៈនាពេលកន្លងមក អំពីការលំបាកក្នុងពេលធ្វើដំណើរក្នុងរដូវវស្សានៅលើកំណាត់ផ្លូវលំ១ខ្សែ អាជ្ញាធរខេត្តផ្តើមជួសជុលជា បន្ទាន់ឡើងវិញ ដើម្បីសម្រួលដល់ការធ្វើ ដំណើររបស់បងប្អូនប្រជាពលរដ្ឋឲ្យបានងាយស្រួលនៅដើមរដូវវស្សានេះ ។
លោក ផាន់ ចាន់ធុល អភិបាលរងខេត្ត ប៉ៃលិននៅថ្ងៃទី៣០ ខែឧសភា ឆ្នាំ២០១៧ នេះ ក្នុងឱកាសចុះពិនិត្យមើលការដ្ឋានជួសជុល ផ្លូវលំ១ខ្សែឲ្យដឹងថា ផ្លូវដែលចាប់ផ្តើមជួសជុលនេះមានប្រវែង១១០០ម៉ែត្រ ស្ថិត ក្នុងភូមិអូរស្ងួត សង្កាត់បយ៉ាខា ក្រុង ខេត្តប៉ៃលិន ។
លោកបន្ដថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែនជានាយករដ្ឋមន្ត្រី តែងតែគិតគូរខ្ពស់ ដល់ជីវភាព និងការរស់នៅរបស់បងប្អូន ប្រជាពលរដ្ឋ ដោយបានជំរុញដល់អ្នកដឹក នាំថ្នាក់ក្រោមត្រូវយកចិត្តទុកដាក់ដោះស្រាយរាល់ទុក្ខលំបាករបស់បងប្អូនប្រជាពលរដ្ឋនៅមូលដ្ឋានឲ្យបានទាន់ពេល វេលា។
ក្នុងឱកាសនោះ លោកក៏បានសំណូមពរដល់បងប្អូនប្រជាពលរដ្ឋទាំងអស់ដែលប្រើប្រាស់ផ្លូវត្រូវចូលរួមថែរក្សា ដើម្បីធានា ដល់ការប្រើប្រាស់បានយូរអង្វែង ហើយ កុំភ្លេចបំពេញកាតព្វកិច្ចជាពលរដ្ឋល្អផងត្រូវអញ្ជើញទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលកំណត់នៅថ្ងៃទី៤ ខែមិថុនា ឆ្នាំ២០១៧ ខាងមុខនេះ ។
សម្រាប់បងប្អូនប្រជាពលរដ្ឋក៏បាន សំដែងនូវសេចក្តីរីករាយយ៉ាងក្រៃលែង ព្រមទាំងបានថ្លែងអំណរគុណយ៉ាងជ្រាលជ្រៅ ចំពោះអាជ្ញាធរខេត្តក៏ដូចជាអាជ្ញាធរមូលដ្ឋាន ព្រមទាំងសប្បុរសជនទាំងអស់ដែល បានជួយជួសជុលផ្លូវ១ខ្សែនេះទៅតាម សំណូមពររបស់ប្រជាពលរដ្ឋ ដែលធ្វើឲ្យ ពួកគាត់ងាយស្រួលធ្វើដំណើរប្រកបមុខ របររកស៊ី និងរស់នៅប្រចាំថ្ងៃ ។
សូមបញ្ជាក់ថា ការជួសជុលផ្លូវលំ១ខ្សែ នេះមិនបានប្រើប្រាស់ថវិការបស់ជាតិនោះទេ គឺជាការចូលរួមពីសំណាក់សប្បុរសជននានា ក្នុងខេត្តនិងអាជ្ញាធរដែនដីគ្រប់លំដាប់ថ្នាក់ ៕ សហការី
