សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យរន្ធត់ បណ្ដាលឲ្យបុរស៣នាក់រងរបួសធ្ងន់ស្រាលខណៈដែលម៉ូតូបើកបញ្ច្រាសទិសហើយឆ្លងថ្នល់ត្រូវម៉ូតូមួយគ្រឿងទៀតគេចមិនផុតបុកចំពាក់កណ្តាលលាន់សូររន្ទះកាលពីវេលាម៉ោង៥ ល្ងាចថ្ងៃទី៥ ខែមិថុនា ឆ្នាំ២០១៧ នៅលើផ្លូវជាតិលេខ១ ស្ថិតក្នុងភូមិទន្លៀង ឃុំរមាំងថ្កោល ស្រុកស្វាយទាប ខេត្តស្វាយរៀង។
បើតាមអ្នកភូមិបានឲ្យដឹងថា នៅមុនពេលកើតហេតុនោះគេឃើញបុរសម្នាក់គេស្គាល់ថា ជាបុគ្គលិកធនាគារប្រាសាក់មានឈ្មោះ សុច ចាន់រី អាយុ ៣០ឆ្នាំជិះម៉ូតូមួយគ្រឿងម៉ាកសង់សេ១២៥ ស៊េរី ឆ្នាំ២០១៦ ពណ៌ ខ្មៅ ពាក់ស្លាកលេខ ស្វាយរង 1i 0288 ធ្វើដំណើរពីទិសខាងកើតទៅលិច លុះមកដល់ចំណុចកើតខាងលើស្រាប់តែមានម៉ូតូមួយគ្រឿងទៀតម៉ាកសង់ឆ្នាំ២០១៧ ពណ៌ ខ្មៅ ពាក់ស្លាកលេខ ស្វាយរៀង 1J 2118 បើកបរដោយឈ្មោះ ភា ភេទប្រុស អាយុ ប្រហែល២០ឆ្នាំជិះឌុបគ្នា២នាក់ធ្វើដំណើរពីលិចមកកើតជិះអែបខាងឆ្វេងដៃបញ្ច្រាសទិសគ្នាហើយខណៈនោះស្រាប់តែបត់ឡើងខាងស្តាំបំណងឆ្លងថ្នល់មិនទាន់ផុតគំនូសផងក៏ត្រូវម៉ូតូសង់ ស៊េរី២០១៦ ធ្វើដំណើរពីកើតបុកចំពាក់កណ្តាលពេញទំហឹងលាន់ដូចរន្ទះបណ្ដាលឲ្យដួលរណូករណែលពេញផ្លូវតែម្ដង។
ក្រោយមកប្រជាពលរដ្ឋបានជួយហៅសមត្ថកិច្ចនិងរថយន្តសង្គ្រោះដើម្បីដឹកជនរងគ្រោះទាំងទៅកាន់មន្ទីរពេទ្យបង្អែកស្រុក។
ចំណែកម៉ូតូទាំង២គ្រឿងសមត្ថកិច្ចធ្វើការវាសវែងនិងយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីរង់ចាំដោះស្រាយគ្នានាពេលក្រោយតាមច្បាប់៕ យឹម សុថាន
