សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍គ្រោះថ្នាក់ចរាចរណ៍មួយ រវាងរថយន្តកុងតឺន័រមួយគ្រឿងបានបើកបុករថយន្តFrontier ខណៈបើកឆ្លងផ្លូវបណ្តាលឲ្យរងការខូចខាតធ្លាក់កាងមុខ។
ហេតុការណ៍នេះ បានកើតឡើងកាលពីវេលាម៉ោង៨និង៣០នាទីយប់ ថ្ងៃទី៦ ខែមិថុនា ឆ្នាំ២០១៧ នៅចំណុចមុខប៉ុស្តិ៍២៤ម៉ោង ផ្លូវវេងស្រេង សង្កាត់ចោមចៅ ខណ្ឌពោធិ៍សែនជ័យ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តម៉ាក Frontier ពណ៌ស ពាក់ស្លាកលេខ ភ្នំពេញ2AL 0952 ធ្វើដំណើរតាមបណ្តោយផ្លូវបេតុង ក្នុងទិសដៅពីត្បូងទៅជើង ខណៈមកដល់ចំណុចផ្លូវវេងស្រេង ក៏ឆ្លងផ្លូវបំណងបត់ទៅលិច ស្រាប់តែមានរថយន្តកុងតឺន័រក្បាលពណ៌ខៀវ ពាក់ស្លាកលេខ ភ្នំពេញ 3A 3756 ធ្វើដំណើរតាមបណ្តោយផ្លូវវេងស្រេង ក្នុងទិសដៅពីកើតទៅលិចក្នុងល្បឿនលឿន ក៏ជ្រុលបុកចំផ្នែកក្បាលរថយន្ត Frontier បណ្តាលឲ្យរងការខូចខាតធ្លាក់កាងរថយន្ត។
សាក្សីដដែលបានបន្តថា បន្ទាប់ពីគ្រោះថ្នាក់រួចតៃកុងរថយន្តកុងតឺន័របាន ចុះពីរថយន្តហើយគេចខ្លួនបាត់ធ្វើឲ្យមានការកកស្ទុះចរាចរណ៍ផងដែរ។
មួយសន្ទុះក្រោយមក ក៏មានបុរសម្នាក់ចេញមុខមកដោះស្រាយ តែដោយសារតែភាគីទាំងសងខាងប្រកែកយកត្រូវរៀងខ្លួនទើបសមត្ថកិច្ចជំនាញវាស់វែងយកទៅរក្សាទុកនៅអធិការនគរបាលខណ្ឌពោធិ៍សែនជ័យរង់ចាំដោះស្រាយពេលក្រោយ៕ សុខាសែនជ័យ
