សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីជាបុគ្គលិកក្រុមហ៊ុនឯកជនម្នាក់ជិះម៉ូតូមួយគ្រឿងចេញពីធ្វើការត្រលប់ទៅផ្ទះវិញ ត្រូវជនសង្ស័យពីរនាក់ជិះម៉ូតូតាមពីក្រោយធ្វើសកម្មភាពឆក់កាបូបស្ពាយបានសម្រេចកាលពីវេលាម៉ោង៧និង១៥នាទីយប់ ថ្ងៃទី៧ ខែមិថុនា ឆ្នាំ២០១៧ នៅចំណុចមុខហាងលក់រថយន្តប្រើថាមពលព្រះអាទិត្យតាមបណ្តោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
សមត្ថកិច្ចនគរបាលមូលដ្ឋានបានឲ្យដឹងថា នារីរងគ្រោះមានឈ្មោះ ជឹម សុម៉ាលី អាយុ25ឆ្នាំ ជាបុគ្គលិកក្រុមហ៊ុនឯកជនមួយ ស្នាក់នៅសង្កាត់ទឹកល្អក់ទី១ ខណ្ឌទួលគោក។ នារីរងគ្រោះ ជិះម៉ូតូមួយគ្រឿងម៉ាកយ៉ាម៉ាហា ហ្វីណូ ពណ៌ខ្មៅលាយសចេញពីធ្វើការ គោលបំណងត្រឡប់ទៅផ្ទះវិញដោយធ្វើដំណើរតាមបណ្តោយផ្លូវសហពន្ធរុស្ស៊ី ក្នុងទិសដៅពីលិចទៅកើត។ ខណៈមកដល់ត្រង់ចំណុចកើតហេតុ ស្រាប់តែមានជនសង្ស័យពីរនាក់ជិះម៉ូតូមួយគ្រឿងមិនចាំម៉ាកនិងស្លាកលេខ ក្នុងទិសដៅស្របគ្នាជាមួយនារីរងគ្រោះ បានធ្វើសកម្មភាពឆក់យកកាបូបស្ពាយដែលនាងដាក់នៅរានមុខម៉ូតូបានសម្រេច បណ្តាលឲ្យរូបនាងដួលបោកទៅនឹងថ្នល់ តែសំណាងល្អមិនមានរងរបួសឡើយ ។ ចំណែកក្រុមជនសង្ស័យទាំងពីរនាក់បានបើកម៉ូតូរត់គេចខ្លួនបាត់ដោយសុវត្ថិភាពដោយយកកាបូបនារីរងគ្រោះទៅជាមួយផង ។
បើតាមនារីរងគ្រោះបានប្រាប់សមត្ថកិច្ចឲ្យដឹងថា នៅក្នុងកាបូប នោះមាន ឯកសារមួយចំនួន ទូរស័ព្ទ Nokia1280 មួយគ្រឿង របស់របរមួយចំនួននិងលុយតិចតួច ។ដោយសារហួសចិត្តពេកនារីរងគ្រោះបានទូរស័ព្ទហៅសាច់ញាតិឲ្យមកយករូបនាងត្រឡប់ទៅផ្ទះវិញដោយមិនខ្ចីដាក់ពាក្យបណ្តឹងនៅនគរបាលប៉ុស្តិ៍ឡើយ ៕ ប្រាថ្នា
