សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ខណៈធ្វើសកម្មភាពលួចម៉ូតូប្រជាពលរដ្ឋបានហើយ បណ្តើរចេញម្ចាស់ឃើញទាន់ស្រែកចោរៗ និងដេញចាប់បានភ្លាមៗប្រគល់ឲ្យសមត្ថកិច្ចកាលពីម៉ោង១១និង៣០នាទីព្រឹក ថ្ងៃទី៩ ខែមិថុនា ឆ្នាំ២០១៧ នៅភូមិសែនសុខទី៧ សង្កាត់ឃ្មួញ ខណ្ឌសែនសុខ រាជធានីភ្នំពេញ។
ជនសង្ស័យឈ្មោះឡុង គីមវ៉ាង ភេទប្រុស អាយុ៣១ឆ្នាំ មុខរបរមិនពិតប្រាកដ ស្នាក់នៅភូមិខ សង្កាត់ច្រាំងចំរះ២ ខណ្ឌឫស្សីកែវ។
ដើមបណ្តឹងជាម្ចាស់ម៉ូតូឈ្មោះ យន់ ស្រ៊ុន អាយុ៤៣ឆ្នាំមុខរបរគ្រូបង្រៀនស្នាក់នៅផ្ទះលេខ២អឺប៉េផ្លូវ២៣២ភូមិសែនសុខទី៧ សង្កាត់ឃ្មួញខណ្ឌសែនសុខ។
ម្ចាស់ម៉ូតូបានប្រាប់ថា នៅមុនកើតហេតុ គាត់បានជិះម៉ូតូរបស់គាត់ម៉ាកឌ្រឹម សង់សេ ១២៥ ពណ៌ខ្មៅ សេរី២០១៣ ពាក់ស្លាកលេខ ភ្នំពេញ 1BV-3614 ចូលមកផ្ទះ ដើម្បីហូបបាយដោយដាក់ក្នុងរបងមុខផ្ទះចាក់សោត្រឹមត្រូវ ក្រោយមកស្រាប់តែបានឮសំឡេងបើកទ្វាររបង ពេលនោះគាត់ចេញពីក្នុងផ្ទះមកមើលម៉ូតូ ស្រាប់ឃើញជនសង្ស័យខាងលើកំពុងបណ្តើរម៉ូតូចេញឃើញដូចនោះ គាត់បានស្រែកចោរៗធ្វើឲ្យជនសង្ស័យភ័យបានផ្តួលម៉ូតូចោរហើយរត់យករួចខ្លួន។
ប្រភពបានប្រាប់បន្តថា ពេលដែលស្រែកចោរៗនោះបណ្តាលឲ្យភ្ញាក់ផ្អើលដល់ប្រជាពរដ្ឋជិតខាងជួយដេញនិងចាប់បានទើបប្រគល់ឲ្យសមត្ថកិច្ចតែម្តង។
បច្ចុប្បន្នជនសង្ស័យបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ៕ តុង សីហា
