សមត្ថកិច្ចនគរបាលខណ្ឌជ្រោយចង្វាឃាត់ខ្លួនជនសង្ស័យ៤នាក់ ដកហូតបានថ្នាំញៀន៣កញ្ចប់ និងម៉ូតូ២គ្រឿង

ភ្នំពេញ៖ សមត្ថកិច្ចនគរបាលខណ្ឌជ្រោយចង្វា ឃាត់ខ្លួនជនសង្ស័យ៤នាក់ ដែលទើបតែមកពីទិញគ្រឿងញៀន ដើម្បីយកទៅប្រើប្រាស់ ខណៈមិនទាន់ទាំងបានទៅដល់គោលដៅ ក៏ត្រូវកម្លាំងនគរបាលខណ្ឌជ្រោយចង្វាដេញតាមរហូតបង្ក្រាបឃាត់ខ្លួនបាន រួមជាមួយថ្នាំញៀន៣កញ្ចប់ និងម៉ូតូ២គ្រឿង។

ប្រតិបត្តិការនេះធ្វើឡើងកាលពីរំលងអាធ្រាត្រ ឈានចូលថ្ងៃទី១២ ខែមិថុនា ឆ្នាំ២០១៧ ស្ថិតនៅតាមបណ្ដោយផ្លូវជាតិលេខ៦ ស្ថិតនៅក្នុងភូមិព្រែកលៀប សង្កាត់ព្រែកលៀប និងនៅភូមិគៀនឃ្លាំង សង្កាត់-ខណ្ឌជ្រោយចង្វា។

លោក ស៊ឹម សាវ៉ាត នាយផ្នែកគ្រឿងញៀនខណ្ឌជ្រោយចង្វាបានឲ្យដឹងថា ជនសង្ស័យត្រូវឃាត់ខ្លួនទី១-ឈ្មោះ សុខ ណេត អាយុ១៩ឆ្នាំ ទី២-ឈ្មោះ ពៅ សុភណ្ឌ អាយុ១៩ឆ្នាំ ទី៣-ឈ្មោះ រស់ ពន្លឺ អាយុ៣១ឆ្នាំ ទី៤-ឈ្មោះ តេង មុនី អាយុ៣០ឆ្នាំ។

លោក ស៊ឹម សាវ៉ាត នាយផ្នែកគ្រឿងញៀនខណ្ឌជ្រោយចង្វាបានឲ្យដឹងទៀតថា ក្រោយពេលដែលកម្លាំងនគរបាលតាមបណ្ដាប៉ុស្ដិ៍ បានបន្តយាមល្បាតក្នុងមូលដ្ឋាន ដោយសហការជាមួយកម្លាំងនគរបាលខណ្ឌ ហើយក៏បានប្រទះឃើញសមាសភាព ដែលជិះម៉ូតូគួរឲ្យសង្ស័យ ទើបឈានដល់ការដេញតាមឃាត់ និងឆែកឆេរត្រួតពិនិត្យ ស្រាប់តែរកឃើញក្រាមសថ្លា ជាថ្នាំញៀនចំនួន៣កញ្ចប់ ដែលជនសង្ស័យទាំង៤នាក់ បានរក្សាលាក់ទុកនូវនិងខ្លួន និងទើបតែមកពីទិញ ដើម្បីយកទៅជក់ ក៍ត្រូវសមត្ថកិច្ចបង្ក្រាប ហើយដកហូតទាំងម៉ូតូចំនួន២គ្រឿងផងដែរ ១គ្រឿងម៉ាក ហុងដា CLICK ពណ៌ស ពាក់ស្លាកលេខកណ្ដាល 1J-7415 និង១គ្រឿងទៀតម៉ាកហុងដាសង់ឌ្រីម ពណ៌ខ្មៅ ពាក់ស្លាកលេខ ព្រៃវែង1H-4089។

ជនសង្ស័យរួមជាមួយវត្ថុតាង ដែលដកហូតបាន ត្រូវបញ្ជូនមកសាកសួរនៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តាមតនីតិវិធី៕ ជ្រោយពេជ្រ