សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ សង្ស័យមានគ្នា២នាក់បានធ្វើសកម្មភាពឆក់កាបូបស្ពាយពីស្រី្តម្នាក់ ដែលកំពុងជិះម៉ូតូជាមួយកូន២នាក់បានសម្រេចហើយជិះរត់គេចខ្លួន តែត្រូវជនរងគ្រោះដេញតាមពីក្រោយស្រែកថាចោរៗ ធ្វើឲ្យផ្អើលឆោឡោដល់អ្នកធ្វើដំណើរតាមផ្លូវ និងបណ្ដាលឲ្យជនសង្ស័យ ភ័យស្លន់ស្លោក៏ផ្ដួលម៉ូតូចោល និងគ្រវែងកាបូបចោលទៀតទើបនាំគ្នា រត់គេចខ្លួនដោយសុវត្ថិភាពតែម្តង។
ហេតុការណ៍នេះ បានកើតឡើងនៅវេលាម៉ោង ២និង១៥នាទី រសៀលថ្ងៃទី១៣ ខែមិថុនា ឆ្នាំ២០១៧ នៅតាមបណ្ដោយផ្លូវជាតិលេខ៥ ត្រង់ទល់មុខសាលាប៊ែលធីអន្តរជាតិ ក្នុងសង្កាត់ស្វាយប៉ាក ខណ្ឌឫស្សីកែវ ។
ជនរងគ្រោះក្នុងហេតុការណ៍នេះបានប្រាប់សមត្ថកិច្ចថា គាត់មានឈ្មោះ ជុំ សុភាព ភេទស្រី អាយុ៣៨ឆ្នាំ មុខរបរលក់ដូរ ជាអ្នកអង្គុយពីក្រោយ ។ ចំណែកអ្នកបើកម៉ូតូ ត្រូវជាកូនមានឈ្មោះ សាញ់ រក្សា ភេទប្រុស អាយុ១៧ឆ្នាំ មុខរបជាសិស្សថ្នាក់ទី១១ វិទ្យាល័យ ហ៊ុន សែន អូកុង នៅសង្កាត់ពញ្ញាពន់ ខណ្ឌព្រែកព្នៅ រួមជាមួយកូនតូចម្នាក់ទៀត ដែលជិះពីក្រោយ ឈ្មោះ សាញ់ រ៉ាស៊ីង ភេទប្រុស អាយុ៨ឆ្នាំ ជាសិស្ស ស្នាក់ជាមួយម្ដាយ ស្ថិតក្នុងភូមិត្បូងវត្ត ឃុំជ្រៃលាស់ ស្រុកពញាឮ ខេត្តកណ្ដាល។
ជនរងគ្រោះបានប្រាប់សមត្ថកិច្ចទៀតថា នៅមុនពេលកើតហេតុ រូបគាត់ បានជិះម៉ូតូម៉ាកហុងដាឌ្រីម ស៊េរី២០១៦ ពណ៌ខ្មៅ ពាក់ស្លាកលេខ ភ្នំពេញ ១FR-៦៦៤២ ចេញពីផ្ទះ ដោយឲ្យកូនជាអ្នកឌុប ក្នុងគោលបំណងមកភ្នំពេញ ដើម្បីទៅទិញអីវ៉ាន់ ហើយធ្វើដំណើរតាមបណ្ដោយផ្លូវជាតិលេខ៥ ពីជើងទៅត្បូង។ ខណៈជិះមកដល់ចំណុចកើតហេតុខាងលើ ស្រាប់តែលេចមុខជនសង្ស័យ២នាក់មានវ័យជិត២០ឆ្នាំ ជិះម៉ូតូម៉ាកហ្វីណូ ពណ៌លឿង ពាក់ស្លាកលេខ ភ្នំពេញ ១C-៣៤៨០ តាមមកពីក្រោយ ហើយបានធ្វើសកម្មភាពឆក់យកកាបូបស្ពាយពីស្មាគាត់បានសម្រេច។បន្ទាប់មក ជនសង្ស័យក៍បានព្យាយាមបើករត់គេច ទើបគាត់ស្រែកថាចោរៗ ហើយកូនក៏ជិះដេញតាមប្រកិតៗពីក្រោយ ធ្វើឲ្យជនសង្ស័យ ភ័យ ក៍ផ្ដួលម៉ូតូចោល និងគ្រវែងកាបូបស្ពាយរបស់គាត់ចោលរួចនាំគ្នារត់គេចខ្លួនដោយសុវត្ថិភាពរៀងៗខ្លួនតែម្ដង។ បន្ទាប់មកគាត់យកបានកាបូបមកវិញ និងយកម៉ូតូរបស់ជនសង្ស័យ១គ្រឿងដែលបន្សល់ទុកនៅកន្លែងកើតហេតុទៅប៉ុស្តិ៍នគរបាលស្វាយប៉ាក ដើម្បីទៅដាក់ពាក្យបណ្ដឹង ឲ្យសមត្ថកិច្ចជួយស្រាវជ្រាវ ឈានទៅដល់ការចាប់ជនសង្ស័យ យកមកផ្ដន្ទាទោសតាមផ្លូវច្បាប់ឲ្យបាន៕ អរុណរះ
