សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានចូលធ្វើកម្មភាពគាស់ផ្ទះប្រជាពលរដ្ឋមួយកន្លែង ខណៈម្ចាស់បិទទ្វាចោលចេញទៅក្រៅបាត់ តែដោយសារតែផ្ទះមានបំពាក់កាមរ៉ាសុវត្ថិភាព ក៏ឆែកឃើញជនសង្ស័យកំពុងធ្វើសកម្មភាព ទើបត្រឡប់មកវិញ និងហៅប្រជាពលរដ្ឋព័ទ្ធចាប់វាយទ្រមខ្លួន ទើបប្រគល់ឲ្យសមត្ថកិច្ច។
ហេតុការណ៍នេះ បានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី១២ ខែកក្កដា ឆ្នាំ២០១៧ នៅចំណុចខាងក្រោយសួនកាណាឌីយ៉ា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ សេង សូនី ភេទប្រុស អាយុ២៨ឆ្នាំ មុខរបរ និងស្នាក់នៅមិនពិតប្រដក។
តាមសាក្សីបានអោយដឹងថា នៅមុនពេលកើតហេតុម្ចាស់ផ្ទះបានចាក់ចោរផ្ទះត្រឹមត្រូវ រួចធ្វើដំណើរចេញទៅក្រៅបាត់។ មួយសន្ទុះក្រោយមកក៏បានឆែកមើលកាមេរ៉ាសុវត្តិភាពក្នុងទូរស័ព្ទដែលបំពាក់នៅជំវិញផ្ទះស្រាប់តែឃើញជនសង្ស័យម្នាក់កំពុងធ្វើសកម្មភាពចូលទៅក្នុងផ្ទះ ក៏ត្រឡប់មកវិញនិងហៅប្រជាពលរដ្ឋដែលនៅក្បែរជួយព័ទ្ធចាប់បានភ្លាមៗនាំគ្នាស្វាគមន៍ម្នាក់មួយដៃមួយជើងបណ្តាលឲ្យទ្រមខ្លួនទើបប្រគល់ឲ្យសមត្ថកិច្ច។
ជនសង្ស័យបានសារភាពថា ខ្លួនធ្លាប់ធ្វើសកម្មភាពគាស់ផ្ទះប្រជាពលរដ្ឋជាច្រើនលើកច្រើនសារមកហើយ។
ក្រោយកើតហេតុ ជនសង្ស័យត្រូវបានសមត្ថកិច្ចសាងសួរ និងកសាងសំណុំរឿងបញ្ជូនទៅអធិការនគរបាលខណ្ឌពោធិ៍សែនជ័យចាត់ការបន្ត ៕ សុខាសែនជ័យ
