សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្មេងស្រីអាយុ១៥ឆ្នាំម្នាក់ បានតែងខ្លួនធ្វើជាមនុស្សប្រុស ដោយសារខ្លួនកំព្រាឪពុកម្តាយ ដោយរស់នៅអនាថាតាមចិញ្ចើមផ្លូវតែម្នាក់ឯង ស្រាប់តែត្រូវក្រុមក្មេងស្ទាវមួយក្រុមសង្ស័យបែកថ្នាំ នាំគ្នាធ្វើសកម្មភាពប្រើដាវសាំម៉ូរ៉ៃកាប់ប្រហារទៅលើរូននាងជាច្រើនដាវ បណ្ដាលឲ្យរងរបួសធ្ងន់ ។
ករណីកាប់ប្រហារខាងលើនេះ បានធ្វើឡើង កាលពីវេលាម៉ោង១រំលងអធ្រាត្រ ឈានចូលថ្ងៃទី១២ ខែកក្កដា ឆ្នាំ២០១៧ ត្រង់ចំណុចផ្លូវ១៣២កែងនឹងផ្លូវរថភ្លើង ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ ។
ជនរងគ្រោះឈ្មោះ គង់ ផានិត ភេទស្រី (តែងខ្លួនធ្វើប្រុស) អាយុ១៥ឆ្នាំ ជាក្មេងកំព្រាឪពុកម្តាយស្លាប់ចោលតាំងពីតូច មុខរបរអ្នករើសអេតចាយ ស្នាក់នៅមិនពិតប្រាកដ ។
ប្រភពព័ត៌មានពី ក្មេងស្រីរងគ្រោះ បានប្រាប់ឲ្យដឹងថា នៅមុនពេលកើតហេតុរូបនាង បានដើររើសអេតចាយតាមផ្លូវដូចសព្វថ្ងៃ ស្រាប់តែដើរមកដល់ចំណុចទីតាំងខាងលើ រូបនាងបានអង្គុយលេងម្នាក់ឯង លុះដល់ម៉ោងកើតហេតុស្រាប់តែមានក្រុមក្មេងស្ទាវ២នាក់បានដើរមកក្បែរ ដោយសង្ស័យបែកថ្នាំដែលនាងមិនដែលស្គាល់នោះទេ បានដើរចូលជិតរូបគេហើយដកដាវសាំម៉ូរៃកាប់ប្រហារទាំងកំរោលជាច្រើនដាវទៅលើរូបនាង បណ្ដាលឲ្យរងរបួសធ្ងន់ ឈាមហូរស្រោចខ្លួន ។ ចំណែកឯជនដដៃដល់រត់គេចខ្លួនបាត់ស្រមោលតែម្តង ។
ជនរងគ្រោះបានបន្តទៀតថា រូបគេមិនដែលស្គាល់ និងឈ្លោះគ្នាជាមួយក្រុមជនសង្ស័យពីមុននោះទេ ហើយក៏មិនដឹងមូលហេតុអ្វីនោះឡើយ ។
ក្រោយកើតហេតុជនរងគ្រោះ ត្រូវបានសមត្ថកិច្ចនិងប្រជាពលរដ្ឋ ធ្វើការទំនាក់ទំនងជាមួយរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែតភ្លាមៗផងដែរ ៕ស តារា
