សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ត្រូវនគរបាលប៉ុស្តិ៍ឃ្មួញឃាត់ខ្លួនករណីប្រើប្រាស់នូវសារធាតុញៀ ន កាលពីវេលាម៉ោង៥និង០០នាទីល្ងាច ថ្ងៃទី២៧ ខែកក្កដា ឆ្នាំ២០១៧ នៅចំណុចបន្ទប់ជួល ភូមិសែនសុខ៧ សង្កាត់ឃ្មួញ ខណ្ឌសែនសុខ។
ប៉ូលីសនិយាយថាជនសង្ស័យទាំងពីរនាក់នោះ ទី១មានឈ្មោះ ឡុង សុខលឹម ភេទប្រុស អាយុ២៧ឆ្នាំ មុខរបរធ្វើសំណង់ទី២ឈ្មោះ ឡុង សុខឡៃ ភេទប្រុសអាយុ២០ឆ្នាំ មុខរបរធ្វើសំណង់ទាំង២នាក់ ស្នាក់នៅបន្ទប់ខាងលើជាបងប្អូន ទីកន្លែងកំណើត សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
លោក ញាណ នន នាយប៉ុស្តិ៍នគរបាលរដ្ឋបាលឃ្មួញបានឲ្យដឹងថា មុននឹងឃាត់ខ្លួនជនសង្ស័យទាំង២នាក់ខាងលើ ដោយមានប្រជាពលរដ្ឋបានរាយការណ៍ថា នៅចំណុចខាងលើនោះ មានក្មេងស្ទាវប្រើប្រាស់គ្រឿងញៀន ទើបលោកបានសុំគោលការណ៍ពីលោកវរសេនីយ៍ឯក ម៉ក់ ហុង អធិការនគរបាលខណ្ឌចុះបង្ក្រាប និងឃាត់ខ្លួនបានជាក់ស្តែងតែម្តង។
លោកនាយប៉ុស្តិ៍បន្តថា ក្នុងសម្ភារដកហូតមានឧបករណ៍សម្រាប់ជក់ថ្នាំមួយចំនួន ប៉ុន្តែមិនបានថ្នាំញៀននោះទេ ព្រោះពួកគេបានជក់អស់ហើយ។
បច្ចុប្បន្នជនសង្ស័យទាំង២នាក់កំពុងឃាត់ខ្លួននៅអធិការដ្ឋាននគរបាលខណ្ឌសែនសុខចាត់ការបន្តតាមនីតិវិធី៕ តុង សីហា
