សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ បុរសម្នាក់បានឈ្លក់ទឹកលង់ស្លាប់ បង្កមានការភ្ញាក់ផ្អើល និងឆោឡោឡើង ខណៈដែលជនរងគ្រោះបានឆ្លងប្រឡាយដេញសត្វគោរបស់ខ្លួន កាលពីវេលាម៉ោងជិត៥រសៀល ថ្ងៃទី២៧ ខែកក្កដា ឆ្នាំ២០១៧ ស្ថិតនៅចំណុចភូមិជុបព្រីង ឃុំថ្មីស្រុកកំពង់រោទិ៍ ។
សមត្ថកិច្ចនគរបាលស្រុកបានអោយដឹងថា បុរសដែលស្លាប់មានឈ្មោះអាត់ ផូ អាយុ៦០ឆ្នាំ មុខរបរកសិករ រស់នៅភូមិជុបព្រីង ឃុំថ្មី ស្រុកកំពង់រោទិ៍ ។
តាមអ្នកភូមិបានអោយដឹងថា មុនកើតហេតុ គេឃើញសត្វគោរបស់គាត់ឆ្លងប្រឡាយទឹកទៅត្រើយម្ខាងដើម្បីស៊ីស្មៅហើយរហូតដល់ពេលរសៀលម៉ោងជិត៥ ជនរងគ្រោះក៏បានដើរទៅយកគោត្រឡប់មកផ្ទះដូចសព្វដង ប៉ុន្តែស្រាប់តែគោហែលទៅត្រើយម្ខាងហៅមិនឮ ទើបជនរងគ្រោះដាច់ចិត្តហែលទឺកប្រឡាយដើម្បីដេញគោមកវិញ។
ប្រភពបន្តថា ខណៈហែលបានពាក់កណ្ដាលប្រឡាយទឹកស្រាប់តែលិចបាត់ក៏បង្កអោយការឆោឡោ និងអ្នកភូមិហៅគ្នាជួយដែរប៉ុន្តែយឺតពេលទៅហើយដោយឈ្លក់ទឹកស្លាប់មិនអាចជួយសង្គ្រោះបាននោះទេ។
ក្រោយមកសមត្ថកិច្ចបានប្រគល់សាកសពទៅអោយក្រុមគ្រួសារធ្វើបុណ្យតាមប្រពៃណី ទាំងក្ដុកក្ដួលបំផុត៕ យឹម សុថាន
