សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ មានសេចក្តីរាយការណ៍ពីពលរដ្ឋរស់នៅភូមិអន្លុងទ្រា ឃុំព្រៃកជ្រៃ ស្រុកពោធិ៍រៀង ថា នៅព្រឹកថ្ងៃទី29 កក្កដា ឆ្នាំ2017 ពលរដ្ឋប្រមាណ៣១គ្រួសារ បានលើកគ្នាទៅសុំឲ្យលោក កង សំអឿន មេឃុំព្រែកជ្រៃជួយដោះស្រាយរឿងប្តឹងតវ៉ាបើកផ្លូវលំអានចាស់ តែត្រូវបានលោកមេឃុំនិយាយថា មិនដោះស្រាយរឿងឲ្យទេ។
លោក សុន សុផល អាយុ៤៩ឆ្នាំ ជាប្រជាពលរដ្ឋ បានឲ្យដឹងថា ក្រោយពីមានពលរដ្ឋជិត១០០នាក់ផ្ទុះការតវ៉ារឿងសុំបើកផ្លូវលំអានចាស់មេឃុំមិនដោះស្រាយឲ្យ និងមានប្រពន្ធ័ផ្សព្វផ្សាយជាច្រើនបានធ្វើការចុះផ្សាយធ្វើឲ្យលោក កង សំអឿន មេឃុំព្រែកជ្រៃ ឆ្លើយតបវិញនៅចំពោះមុខពលរដ្ឋកាលពីព្រឹកថ្ងៃទី២៩ ខែកក្កដា ឆ្នាំ២០១៧ ថា លោកមិនដោះស្រាយរឿងឲ្យទេទុកឲ្យពួកកាសែត ឬអ្នកផ្សេងដោះទៅ។
ករណីនេះលោក សួន ម៉ាលីន អភិបាលស្រុកពោធិ៍រៀង បានឆ្លើយតបប្រាប់អ្នកកាសែតវិញថា ការលើកឡើងរបស់លោកមេឃុំនោះពុំត្រូវទេយើងជាអាជ្ញាធរដែលពលរដ្ឋបោះឆ្នោតឲ្យ និងមានតួនាទីជាអ្នកបំរើពលរដ្ឋហើយលោកនឹងធ្វើការអប់រំណែនាំលោកមេឃុំមិនឲ្យនិយាយស្ដីដាក់ពលរដ្ឋបែបនេះទៀតឡើយ។
លោកបន្តថា រឿងពលរដ្ឋប្ដឹងសុំបើកផ្លូវលំអានចាស់នោះលោកបានបញ្ជាឲ្យមន្ត្រីជំនាញចុះពិនិត្យហើយនៅរសៀលថ្ងៃទី២៩ ខែកក្កដា យ៉ាងណាក៏មិនបង្អង់យូរដល់ថ្ងៃទី៣១ ខែកក្កដា ឆ្នាំ២០១៧ ឡើយ។
គួរម្លឹកថា ពលរដ្ឋប្រមាណជិត១០០នាក់បានផ្ទុះការតវ៉ា កាលពីព្រឹកថ្ងៃទី២៥ ខែកក្កដា ឆ្នាំ២០១៧ បន្ទាប់អាជ្ញាធរផ្អឹបបណ្ដឹងរបស់ពួកគាត់ចោលរយៈពេលជិត២ខែ ក្រោយប្តឹងទៅកាន់ឈ្មោះ លក្ខ័ និងប្រពន្ធឈ្មោះខូវ មានទីលំនៅភូមិជាមួយ បានធ្វើរបងលួសព័ទ្ធផ្ជិតផ្លូវលំអានចាស់នៅចំណុចជាប់ក្បាលដីរបស់ខ្លួនកាលពីអំឡុងខែ មេសាឆ្នាំ២០១៧។ ការព័ទ្ឋរបងនេះពួកគេទាំង២បាននិយាយថា ខ្លួនទិញដីដល់ណាគឺធ្វើរបងដល់នឹង៕
