សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសវ័យចំណាស់ម្នាក់បានបើករថយនមតបាឡែនចេញពីខាងមុខហាងសំអាងការដើម្បីយកទៅទុកកន្លែងផ្សេង ស្រាប់តែជាន់ហ្វ្រាំង បែរជាច្រឡំជាន់ហ្គែរថយក្រោយ ក៏ជ្រុលបុកទ្វារហាងសំអាងការចូលដល់ខាងក្នុង រងការខូចខាតយ៉ាងដំណំ។
ហេតុការណ៍នេះ បានកើតឡើងកាលពីវេលាម៉ោង៩យប់ ថ្ងៃទី៣១ ខែកក្កដា ឆ្នាំ២០១៧ នៅចំណុចហាង ស្រីលាភ សាឡន ផ្ទះលេខ២៣AB តាមបណ្តោយផ្លូវ១៣៤ ស្ថិតក្នុងសង្កាត់ផ្សាដេប៉ូ២ ខណ្ឌទួលគោក។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរសវ័យចំណាស់ម្នាក់បានចតរថយន្តម៉ាកបាឡែន ពណ៌ស ពាក់ស្លាកលេខ ភ្នំពេញ 2AP 2570 នៅចំណុចមុខហាង ស្រីលាភ សាឡន ក្រោយមកស្រាប់តែបុរសនោះមកបើករថយន្តចេញពីកន្លែងខាងលើដើម្បីយកទៅទុក្ខកន្លែងផ្សេង ហើយក៏បានច្រលំជាន់ហ្គែរថយក្រោយបណ្តាលឲ្យជ្រុលបុកទ្វារហាងនោះចូលដល់ក្នុងផ្ទះបាក់អស់ទ្វារនិងរងការខូចខាតសំភារមួយចំនួន តែមិនមានអ្នករងរបួសនោះទេ។
ក្រោយពេលកើតហេតុ ម្ចាស់រថយន្ត និងម្ចាស់ផ្ទះក៏បានសម្រួលគ្នាដោយភាគីខាងរថយន្តចេញថ្លៃជួសជុលដើម្បីបញ្ចប់រឿងនៅកន្លែងកើតហេតុ ដោយមិនរំខាងដល់សមត្ថកិច្ច៕ សុខាសែនជ័យ
