សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ពេលបញ្ជូនដល់មន្ទីរពេទ្យ ខណៈដែលត្រូវបុរសជនជាតិវៀតណាម បើករថយន្តមិនប្រយត្ន័ ថយក្រោយបុក និងរថយន្តមួយគ្រឿងទៀតបណ្ដាលឲ្យគៀបជាប់កាប៊ីនយ៉ាងពេញទំហឹងកាលពីវេលាម៉ោង៨និង៣០នាទីយប់ ថ្ងៃទី១ ខែសីហា ឆ្នាំ២០១៧ នៅក្នុងការដ្ឋានរបស់ក្រុមសូឡា ស្ថិតក្នុងភូមិធ្លក សង្កាត់ច្រកម្ទេស ក្រុងបាវិត ខេត្តស្វាយរៀង។
យោងតាមសមត្ថកិច្ចនគរបាលក្រុងបាវិតបានឲ្យដឹងថា បុរសដែលស្លាប់មានវ៉ា គួយ អាយុ៤០ ឆ្នាំ ជនជាតិខ្មែរ មុខរបរកម្មករ មានទីលំនៅភូមិធ្លក សង្កាត់ច្រកម្ទេស ក្រុងបាវឹត ខេត្តស្វាយរៀង។
ចំណែកអ្នកបង្កហេតុមាន ឈ្មោះ ចឹង យឹងវៀង ភេទប្រុស អាយុ ២៦ឆ្នាំ ជនជាតិវៀតណាម មុខរបរ បើកបររថយន្ត មានទីលំនៅភូមិផុងភូរ ឃុំកូវជៀ ស្រុកត្រាវិញ ខេត្តត្រាវិញត្រូវបានសមត្ថកិច្ចឃាត់ខ្លួនបានភ្លាមៗ។
តាមសាក្សីបានឲ្យដឹងថា មុនកើតហេតុមានបុរសជនជាតិវៀតណាមម្នាក់ បានបើករថយន្តកុងតឺន័រមួយគ្រឿង មិនចាំស្លាកលេខ ក្នុងការដ្ឋានរបស់ក្រុមសូឡា ហើយបាន ថយក្រោយមិនប្រយត្ន័ស្រាប់តែទៅបុក និងរថយន្តផ្ទេអីវ៉ាន់ ០១គ្រឿងពីក្រោយ បណ្ដាលឲ្យបុរសអ្នកបើកបរគៀបជាប់ ស្រែកហៅជួយសង្គ្រោះ ទើបកម្មករនៅក្បែរបាននាំគ្នាជួយដឹកមកកាន់មន្ទីរពេទ្យ ប៉ុន្តែយឺតពេលទៅហើយដោយរបួសធ្ងន់ពេកក៏ដាច់ខ្យល់ស្លាប់។
រីឯជនបង្កជាអ្នកបើកបរ និងវត្ថុតាង ត្រូវបានសមត្ថកិច្ចនាំយកមកអធិការដ្ឋាន នគរបាលក្រុងបាវិត ដើម្បីកសាងសំណុំរឿងបញ្ជួនទៅការិយាល័យជំនាញខេត្តស្វាយរៀងចាត់ការបន្ដ។
ចំពោះសាកសពត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕ យឹម សុថាន
