សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ មុខសញ្ញាប្រើប្រាស់គ្រឿងញៀន៣នាក់ ត្រូវបានសមត្ថកិច្ចនគរបាលក្រុងតាខ្មៅចេញល្បាតចាប់ខ្លួនបានដើម្បីចាត់ការតាមច្បាប់ គ្រាដែលមុខសញ្ញាទាំង៣នាក់កំពុងអង្គុយត្រង់ចំណុចស្ពានថ្មខាងត្បូង កាលពីវេលាម៉ោង២៣និង១០នាទី ថ្ងៃទី១៥ ខែសីហា ឆ្នាំ២០១៧ ស្ថិតក្នុងភូមិតាខ្មៅ សង្កាត់/ក្រុងតាខ្មៅ ។
មន្ត្រីនគរបាលប្រឆាំងគ្រឿងញៀនក្រុងតាខ្មៅបានឲ្យដឹងថា ជនសង្ស័យដែលត្រូវបានចាប់ខ្លួននោះ ទី១-ឈ្មោះ អាន សុខហេង ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ២-ឈ្មោះ អិន នៅ ភេទប្រុស អាយុ២៧ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិព្រែកតាគង់ សង្កាត់ចាក់អង្រែរលើ ខណ្ឌមានជ័យ រាជធានីភ្នំពេញ និងទី៣-ឈ្មោះ ចៅ កាណាន់ ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ មានទីលំភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។ វត្ថុតាងរឹបអូសបានរួមមាន៖ ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០១កញ្ចប់និងម៉ូតូ០១គ្រឿង ម៉ាកស៊ុយហ្ស៊ូគី ស្មាស ពណ៌ខ្មៅ ពាក់ស្លាកលេខខេមរភូមិន្ទ1-1168 ។
ប្រភពដដែលបានបន្តថា នៅមុនពេលកើតហេតុកម្លាំងនគរបាលប្រឆាំងគ្រឿងញៀនក្រុងតាខ្មៅ បានចេញល្បាតតាមផ្លូវក៏ប្រទះឃើញជនសង្ស័យទាំង៣នាក់ខាងលើនេះកំពុងតែអង្គុយត្រង់ចំណុចកើតហេតុ ។ ដោយមានការសង្ស័យកំលាំងសមត្ថកិចបានចូលទៅធ្វើការសួរនាំ ស្រាប់តែជនសង្ស័យម្នាក់ឈ្មោះ អាន សុខហេង បានទំលាក់ថ្នាំញៀនទៅលើផ្លូវ ។ក្រោយមកកំលាំងសមត្ថកិច្ចធ្វើការឃាត់ខ្លួនជនសង្ស័យទាំងបីនាក់ រួមជាមួយវត្ថុតាងបញ្ជូនទៅកាន់អធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធី ។
ជនសង្ស័យទាំងបីនាក់ខាងលើបានសារភាពថា ថ្នាំញៀនដែលនៅលើផ្លូវនោះពិតជារបស់ខ្លួនមែន ហើយពួកគេទាំងបីនាក់ធ្លាប់បានប្រើប្រាស់អស់រយៈពេលជិតបីឆ្នាំកន្លងមកហើយ ។ ក្រៅពីប្រើប្រាស់ថ្នាំញៀន ខ្លួនមិនធ្លាប់បានប្រព្រឹត្តបទល្មើស លូច ឆក់ ប្លន់ រឺក៍ អំពើហឹង្សា អ្វីឡើយ ៕ ស្អាងជ័យ
