សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនជាតិចិនម្នាក់ដែលលួចដំឡើងប្រព័ន្ធអ៊ីនធឺណិតបម្រើឱ្យការចាប់ជំរិតនៅសណ្ឋាគារ”ត្រានីកា” ត្រូវបាននគរបាលព្រហ្មទណ្ឌនៃស្នងការដ្ឋាននគរបាលខេត្តកណ្ដាល នៅព្រឹកថ្ងៃទី៣០ ខែសីហា នេះ បញ្ជូនដល់អយ្យការអមសាលាដំបូងខេត្តកណ្ដាល ហើយ ដើម្បីចាត់ការតាមច្បាប់ ។ បច្ចុប្បន្នជនសង្ស័យ កំពុងស្ថិតក្រោមចំណាត់ការរបស់លោក ទិន សុចិត្រា ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ។
ពាក់ព័ន្ធករណីនេះ លោកឧត្តមសេនីយ៍ត្រី រឿន ណារ៉ា ស្នងការរងខេត្ត និងជាប្រធានការិយាល័យនគរបាលកណ្ដាលព្រហ្មទណ្ឌខេត្តកណ្ដាល ធ្លាប់ប្រាប់ថា ប្រតិបត្តិការបង្ក្រាបនេះ ត្រូវបានធ្វើនៅថ្ងៃទី២៨ ខែសីហា ឆ្នាំ២០១៧ នៅបន្ទប់លេខ៣០៦ ជាន់ទី៣ សណ្ឋាគារ “ត្រានីកា”ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ក្រោមការបញ្ជាផ្ទាល់ពី លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តបដោយមានការសម្របសម្រួលពី ព្រះរាជអាជារង លោក ទិន សុចិត្រា។
លោកឧត្តមសេនីយ៍ត្រីស្នងការរង បញ្ជាក់ថា ជនជាតិចិនដែលបង្ក្រាបបាននេះ ឈ្មោះ ZHU CHULE អាយុ៣១ឆ្នាំ កាន់លិខិតឆ្លងដែនលេខ G-51567813 ដោយក្នុងនោះដកហូតបាន ឧបករណ៍បន្ទះស្តើង ក្នុង០១បន្ទះ មានអង់តែន, ឧបករណ៍មានភ្លើងទទួលខ្សែ ពីបន្ទះស្តើង, ឧបករណ៍ ម៉ាក Kingtel, ម៉ូតូ០១គ្រឿង ពាក់ស្លាកលេខភ្នំពេញ1R-2104។
បើតាមការរៀបរាប់ពី មេការសណ្ឋាគារបំភ្លឺថា ជនជាតិចិនខាងលើបានជិះម៉ូតូ ម៉ាក Click ពណ៌ឈាមជ្រូក មកជួលសណ្ឋាគារត្រានីកា បន្ទប់លេខ៣០៦ កាលពីថ្ងៃទី២៧ ខែសីហា ឆ្នាំ២០១៧ វេលាម៉ោង១១៖៣០នាទី។ លុះដល់ម៉ោង០៤៖១៧នាទី ជនសង្ស័យខាងលើ បានចាកចេញដោយមធ្យោបាយដដែល ហើយមិនបានត្រឡប់មកវិញឡើយ។
ស្នងការរងបន្ថែមថា ដោយបានទទួលព័ត៌មាននេះភ្លាម កម្លាំងជំនាញដឹកនាំដោយ លោកអធិការនគរបាលក្រុងតាខ្មៅ បានចុះធ្វើកិច្ចការស្រាវជ្រាវបន្ត តាមឃ្លាំមើល ជាមួយមេការសណ្ឋាគារ ត្រានីកា។ លុះវេលាម៉ោង ០៧៖០០នាទី នៅថ្ងៃទី២៨ ខែសីហា ឆ្នាំ២០១៧ បានវិលត្រឡប់ចូលមក ដល់សណ្ឋាគារវិញ សមត្ថកិច្ចបានធ្វើការឃាត់ខ្លួនជនសង្ស័យ និងឆែកឆេរបន្ទប់ចាប់យកវត្ថុតាង ឧបករណ៍ពាក់ព័ន្ធ ហើយបញ្ជូនទៅស្នងការដ្ឋាននគរបាលខេត្តកណ្ដាល ដើម្បីបន្តចាត់ការតាមនីតិវិធី៕ចេស្តា
