សារព័ត៌មាន នគរវត្ត តែងតែនាំមុខគេជានិច្ច
ប្រភពពីប្រជាពលរដ្ឋស្រុកភ្នំស្រួច និងស្រុកឱរ៉ាល់ ខេត្តកំពង់ស្ពឺ បានឲ្យដឹងថាបច្ចុប្បន្នបទល្មើសដឹកជញ្ជូនឈើឆ្លងកាត់ស្រុកទាំង២នេះ កំពុងកើតឡើងយ៉ាងពេញបន្ទុកដោយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។ ផ្ទុយទៅវិញលោក ស ស៊ីប៉ូឡែត នាយសង្កាត់រដ្ឋបាលព្រៃឈើតាសាត បានបញ្ជាឲ្យកូនចៅចងអង្រឹងនៅទល់មុខថ្នាលបណ្ដុះកូនឈើចាំយកលុយពីឈ្មួញដឹកជញ្ជូនឈើខុសច្បាប់ និងពលរដ្ឋដឹកអនុផលព្រៃឈើតាមអំពើចិត្ត។ ប្រការនេះទំនងជាមានការឃុបឃិតបើកដៃពីលោក ឈាង តុលា ប្រធានមន្ទីរកសិកម្មខេត្តកំពង់ស្ពឺ និងនាយខណ្ឌរដ្ឋបាលព្រៃឈើខេត្តកំពង់ស្ពឺផងដែរ ទើបលោក ស ស៊ីប៉ូឡែត និងបក្ខពួកហ៊ានធ្វើអ្វីៗស្រេចតែអំពើចិត្ត។
តាមប្រភពពីប្រជាពលរដ្ឋដែលរកស៊ីដឹកអុស ដឹកធ្យូង ដែលជាអនុផលព្រៃឈើបានឲ្យដឹងថា ពេលពួកគាត់បើកបរគោយន្តឆ្លងកាត់មុខទីតាំងថ្នាលបណ្ដុះកូនឈើតាសាទ គឺត្រូវបង់លុយតាមការកំណត់របស់ក្រុមមន្ត្រីក្រោមឱវាទលោក ស ស៊ីប៉ូឡែត នាយសង្កាត់រដ្ឋបាលព្រៃឈើតាសាទ។ ក្នុងនោះរ៉ឺម៉កដឹកធ្យូងត្រូវបង់៥ម៉ឺនរៀល គោយន្តដឹកបង្គោលរបងត្រូវបង់៨ម៉ឺនរៀល រថយន្តដឹកអុសត្រូវបង់១០ម៉ឺនរៀល គោយន្តដឹកឈើដុលត្រូវបង់១៥ម៉ឺនរៀល និងរថយន្តដឹកឈើក្រហមត្រូវបង់២០ម៉ឺនរៀល។ ប្រភពពីសកម្មជនព្រៃឈើនិងមន្ត្រីអង្គការក្រៅរដ្ឋាភិបាលបានឲ្យដឹងថា ប្រសិនបើពលរដ្ឋមិនបង់លុយតាមការកំណត់ទេនោះ គឺលោក ស ស៊ីប៉ូឡែត ព្រមទាំងបក្ខពួកចាប់រឹបអូសយកទាំងរ៉ឺម៉ក ទាំងគោយន្ត ទាំងធ្យូង ទាំងអុស ទាំងឈើ ដោយពុំមានការយោគយល់ឡើយ។
ដោយឡែកតាមការបង្ហើបពីក្រុមឈ្មួញដឹកឈើតាមរថយន្តធំៗបានឲ្យដឹងថា ពួកគេត្រូវបង់លុយប្រចាំខែឲ្យលោក ស ស៊ីប៉ូឡែត និងបក្ខពួកដោយក្នុង១ខែៗសម្រាប់រថយន្ត១គ្រឿងចាប់ពី១០០០ដុល្លារទៅ២០០០ដុល្លារទើបអាចដឹកជញ្ជូនឈើទៅដល់គោលដៅដោយគ្មានការរំខាន។ ដោយសារតែអំពើពុករលួយរបស់លោក ស ស៊ីប៉ូឡែត នាយសង្កាត់រដ្ឋបាលព្រៃឈើតាសាទ និងបក្ខពួកបែបនេះហើយទើបព្រៃឈើនៅក្នុងស្រុកឱរ៉ាល់ និងស្រុកភ្នំស្រួច កំពុងប្រឈមនឹងសេចក្ដីវិនាស ហើយប្រធានមន្ទីរកសិកម្មខេត្តកំពង់ស្ពឺ ក៏ដូចជាមេរដ្ឋបាលព្រៃឈើខេត្តកំពង់ស្ពឺ កំពុងរក្សាភាពស្ងៀមស្ងាត់មិនចាត់វិធានការបង្ក្រាបបទល្មើសព្រៃឈើឡើយ៕
