សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ ប្រភេទដើមឈើស្រឡៅតូច-ធំរាប់សិបកំណាត់ ត្រូវបានឈ្មួញបង្កប់ក្រោមក្បនអុសបណ្តែតតាមផ្លូវទឹក នាំយកមកពីភូមិភាគឦសាន កំពុងលាក់ទុក នៅចំណុចក្បែរច្រាំងទន្លេ ពីភូមិថ្មគោល រហូតដល់ ភូមិល្អាងលើ ឃុំល្អាង ស្រុកកំពង់សៀម ខេត្តកំពង់ចាម ដោយអាជ្ញាធរមូលដ្ឋាន និងមន្ត្រីជំនាញពាក់ព័ន្ធ មិនមានចំណាត់ការសោះឡើយ។
ប្រជាពលរដ្ឋបានឲ្យដឹងថា គំនរឈើស្រឡៅ ដែលគេដាក់តម្រៀបគរលើគ្នារាប់សិបដើមនេះ ត្រូវគេដឹងថាមានឈ្មោះ រត្ន័ ឈ្មោះចាន់នី និងឈ្មួញម្នាក់ទៀតឈ្មោះ ប្រុស មានឋានៈជាមន្ត្រីនគរបាលប៉ុស្តិ៍គៀនជ្រៃ បានបង្កប់នៅក្រោមក្បូនអុស ដែលពួកឈ្មួញចេញទៅកាប់នៅខែមិនា ខែមេសា ដោយវិចម្ហូបអង្ករដាក់ទៅតាមជាមួយផង ហើយបណ្តែតតាមដងទន្លេមេគង្គ ចេញពីខេត្តស្ទឹងត្រែងក្នុងកំឡុងទឹកឡើង រួចយកមកលាក់ទុកនៅចំណុចភូមិថ្មគោល ភូមិរអាងលើ ភូមិកៀនជ្រៃ ក្នុងស្រុកកំពង់សៀម តាមបណ្តោយដងទន្លេមេគង្គ ដើម្បីអារជ្រៀកលក់បន្តឲ្យឈ្មួញ ក្នុង១ម៉ែត្រគូប តម្លៃ៥០០ដុល្លារអាមេរិក។
ពាក់ព័ន្ធករណីជំនួញឈើខុសច្បាប់នេះ លោក ប៊ិន ឡាដា អភិបាលស្រុកកំពង់សៀម លោកនឹងចាត់តាំងកម្លាំងចុះទៅមើលនៅពេលណាមួយមិនខាន។ ដោយឡែកមន្ត្រីជំនាញ លោក ប្រាក់ រ៉ូម៉ា នាយខណ្ឌរដ្ឋបាលព្រៃឈើខេត្តកំពង់ចាម បានឲ្យដឹងថា ករណីឈើស្រឡៅខាងលើនេះ គឺលោកបានចាត់តាំងកម្លាំងចុះទៅមើលម្តងរួចមកហើយ ដោយអះអាងថា ជាឈើរបស់ប្រជាពលរដ្ឋ។ តែទោះជាយ៉ាងណា លោក នឹងចាត់តាំងកម្លាំងចុះទៅមើលឲ្យបានជាក់លាក់ម្តងទៀតនៅពេលក្រោយ។
ប្រជាពលរដ្ឋរស់នៅក្នុងតំបន់ខាងលើ បានសំណូមពរដល់អាជ្ញាធរមូលដ្ឋាន ជាពិសេសសមត្ថកិច្ចជំនាញពាក់ព័ន្ធ គួរមានចំណាត់ការទប់ស្កាត់បង្ក្រាបបទល្មើសដូ ចជាករណីជំនួញឈើខុសច្បាប់នេះផង។
សូមបញ្ជាក់ថា ប្រភេទឈើស្រឡៅនេះ ជាប្រភេទឈើលេខ១ បន្ទាប់ពីឈើប្រណីតផ្សេងៗ ហើយក៏ជាប្រភេទឈើកម្រ ដែលមានតម្លៃថ្លៃផងដែរ៕ ហេង សូរិយា
