សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ខ្លីម៉ូតូបងប្អូនជិះទៅមើលម្ដាយឈឺនៅស្រុកកំណើតនៅខេត្តតាកែវ មកដល់មុខប៉ុស្តិ៍នគរបាលជើងឯកត្រូវជនសង្ស័យមានគ្នា៣នាក់ជិះម៉ូតូសង់កូរេមួយគ្រឿងមកធ្វើសកម្មភាពវាយប្លន់យកម៉ូតូបានសម្រេច រួចជិះគេចខ្លួនបាត់ដោយសុវត្ថិភាព។
ហេតុការណ៍ក្រុមចោរព្រហេីនហ៊ានប្លន់នៅមុខប៉ុស្តិនគរបាលជើងឯកខាងលើនេះ បានកើតឡើងកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី៧ ខែកញ្ញា ឆ្នាំ២០១៧ នៅបណ្ដោយ២១៧ ត្រង់ចំណុចមុខប៉ុស្តិ៍នគរបាលរដ្ឋបាលជើងឯក ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។
បុរសរងគ្រោះព្រោះក្រុមចោរប្លន់យកម៉ូតូទៅបាត់ខាងលើ មានឈ្មោះ សាត វិបុល អាយុ២៩ឆ្នាំ មុនរបរម៉ៅការសំណង់នៅក្រុងប៉ោយប៉ែត ខេត្តបន្ទាយមានជ័យ ។
បើតាមសម្ដីបុរសរងគ្រោះខាងលើ បាននិយាយប្រាប់ឲ្យដឹងថា នៅយប់ថ្ងៃកើតហេតុ រូបគាត់ទទួលបានដំណឹងថា ម្ដាយឈឺធ្ងន់កំពុងសម្រាកនៅមន្ទីរពេទ្យ ត្រឡាប់ ក្នុងខេត្តតាកែវ ហើយរូបគាត់ជាជនរងគ្រោះ ក៏បានទៅខ្ចីម៉ូតូបងប្អូនមួយគ្រឿងម៉ាក ហុង់ដាឌ្រីម សង់ សេ៊រីឆ្នាំ២០១០ ពាក់ស្លាកលេខ ភ្នំពេញ 1AM.1226 ដើម្បីជិះមកមើលម្ដាយនៅឯមន្ទីរពេទ្យ ត្រឡាប់ ក្នុងខេត្តតាកែវ គឺទៅទាំងយប់តែម្ដង ។
ខណៈធ្វើដំណើរមកដល់ចំណុចកើតហេតុ ក៏លេចមុខជនសង្ស័យ៣នាក់ ជិះម៉ូតូ១គ្រឿង ម៉ាកសង់កូរ៉េ តែមិនចាំស្លាកលេខ បានជិះឌុបគ្នាមកតាមក្រោយ ហើយធ្វើសកម្មភាព មកធាក់ម៉ូតូគាត់ពីចំហៀងបណ្ដាលឲ្យដួងរងរបួសស្រាល។
ក្រោយពេលកើតហេតុភ្លាមៗ ក្រុមជនសង្ស័យទាំង៣នាក់ បានលេីកយកម៉ូតូជិះឌុបគ្នារត់គេចខ្លួនបាត់ស្រមោលសូន្យឈឹងតែម្ដង ។
ចំណែកបុរសងគ្រោះខាងលើត្រូវបានសមត្ថកិច្ចប៉ុស្ដិ៍នគរបាលរដ្ឋបាលជើងឯក ដឹកយកទៅកាន់ប៉ុស្ដិ៍នគរបាលរដ្ឋបាលដង្កោវិញ ព្រោះជាម្ចាស់ករណី ៕ ភារ៉ា ដង្កោ
