សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ បដិសេធពុំអនុញ្ញាតឱ្យក្រុមតំណាងរាស្ត្រគណបក្សសង្គ្រោះជាតិ ជួបលោក កឹម សុខា ក្នុងពន្ធនាគារត្រពាំងផ្លុង នៃខេត្តត្បូងឃ្មុំ ទេ ។
តាមរយៈលិខិតជម្រាបជូនលោកស្រី មូរ សុខហួរ តំណាងរាស្ត្រគណបក្សសង្គ្រោះជាតិ កាលពីថ្ងៃទី០៦ ខែកញ្ញា លោក គី ឫទ្ធី ថ្លែងថា ដោយសារសំណុំរឿងស្ថិតក្នុងចំណាត់ការស៊ើបសួរនិងស្រាវជ្រាវប្រមូលភស្តុតាងនានា ហើយចៅក្រមពុំទាន់បានសាកសួរជនត្រូវចោទនៅឡើយ ហេតុនេះការជួបឬសួរសុខទុក្ខ អាចអនុញ្ញាតឱ្យបានតែមេធាវីនិងក្រុមគ្រួសារជនត្រូវចោទដែលមិនទាក់ទិននៅក្នុងសំណុំរឿងតែប៉ុណ្ណោះ ។
ចៅក្រមស៊ើបសួរ អះអាងថា សម្រាប់អ្នកដទៃផ្សេងទៀត ការសួរសុខទុក្ខ អាចអនុញ្ញាតបានក្រោយពីបានបំពេញកិច្ចចាំបាច់មួយចំនួនសិន ។
គួរបញ្ជាក់ថា លោក គី ឫទ្ធី ចៅក្រមស៊ើបសួរនិងជាអនុប្រធានសាលាដំបូងរាជធានីភ្នំពេញ កាលពីថ្ងៃទី០៦ ខែកញ្ញា នេះ សម្រេចចេញដីកាឃុំខ្លួនលោក កឹម សុខា ជាប់ចោទបទល្មើស”ក្បត់ជាតិ”ដែលអាចប្រឈមមុខនឹងការជាប់ពន្ធនាគារពី១៥ឆ្នាំទៅ៣០ឆ្នាំ ។
សេចក្តីថ្លែងការណ៍របស់អយ្យការអមសាលាដំបូងរាជធានីភ្នំពេញ បង្ហាញថា លោក កឹម សុខា ជាប់ចោទប្រកាន់ពីបទ”សន្ទិដ្ឋិភាពជាមួយបរទេស”តាមមាត្រា៤៤៣នៃក្រមព្រហ្មទណ្ឌ ៕ ចេស្តា
