បើកឡានបុកបង្គោលភ្លើងរួចហោះធ្លាក់ចូលស្រះទឹកស្លាប់ និងរបួសច្រើននាក់

ខេត្តស្វាយរៀង៖ យ៉ាងហោចណាស់មនុស្សម្នាក់ស្លាប់ និង៤នាក់ទៀតរបួសធ្ងន់ ស្រាល ដោយគ្រោះថ្នាក់ចរាចរណ៍ជិះរថយន្តបុកបង្គោលភ្លើង ហើយធ្លាក់ចូលទឹកស្រះខាងមុខសាលាមឋមសិក្សា ហ៊ុន សែន អូវ៉ាង កាលពីថ្ងៃទី២៧ ខែកញ្ញា ឆ្នាំ២០១៧វេលាម៉ោង៣និង៣០នាទីទៀបភ្លឺនៅ លើផ្លូវជាតិលេខ១ ចន្លោះគីឡូម៉ែត្រលេខ១៦១ទៅ១៦២ ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង ។

យោងតាមសមត្ថកិច្ចបានឲ្យដឹងថា មុនកើតហេតុមានរថយន្តម៉ាកCAMRYពណ៌ស ពាក់ស្លាកលេខ ភ្នំពេញ2C5920 បើកបរដោយឈ្មោះ គឹម ហ៊ា ភេទប្រុស អាយុ៣៤ឆ្នាំ ជនជាតិខ្មែរមានទីលំនៅភូមិគ្រួស ឃុំគ្រួស ស្រុកស្វាយជ្រំ ខេត្តស្វាយរៀង និងអ្នករួមដំណើរ៤នាក់មាន ឈ្មោះជា ចន្ទោ ភេទប្រុស អាយុ២៨ឆ្នាំ ជនជាតិខ្មែរ មុខរបកសិករ មានទីលំនៅភូមិបុស្សលាវ ឃុំបុស្សលាវ ស្រុកក្រចេះ ខេត្តក្រចេះ, ឈ្មោះជា ណាវឿន ភេទប្រុស អាយុ៣៤ឆ្នាំ ភេទប្រុស ជនជាតិខ្មែរ មុខរបរកសិករ រស់នៅភូមិកញ្ចំ ឃុំកញ្វំ ស្រុកពារាំង ខេត្តព្រៃវែង និង២នាក់ទៀត មិនស្គាល់ឈ្មោះ ដោយធ្វើដំណើរពីកើតទៅលិច ក្នុងល្បឿនលឿន ស្រាប់តែរេចង្កូតទៅបុកបង្គោលភ្លើង រួចធ្លាក់ចូលស្រះទឹកបណ្ដាលឲ្យអ្នកបើកបរស្លាប់នៅនឹងកន្លែងតែម្ដង។

បច្ចុប្បន្នអ្នកស្លាប់ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសកំពុងព្យាបាលនៅមន្ទីរសម្រាកព្យាបាលផាសុភាព២បាវិត។

សមត្ថកិច្ចបញ្ជាក់ថា ករណីនេះកើតឡើងដោយមូលហេតុ អ្នកបើបបររថយន្តប្រើប្រាស់ល្បឿនលឿន។

រីឯវត្ថុតាងរថយន្តសមត្ថកិច្ចស្ទូចយកមករក្សាទុកនៅអធិការដ្ឋាននគរបាលក្រុងបាវិតដើម្បីបំពេញសំណុំរឿងតាមនីតិវិធី៕ យឹម សុថាន