ម៉ូតូពីរគ្រឿងបុកគ្នា រងបួសធ្ងន់៣នាក់ ម៉ូតូខូចខាតទាំងពីរគ្រឿង

ភ្នំពេញ: មានឧប្បត្តិហេតុគ្រោះថ្នាក់ចរាចរណ៍មួយ កើតឡើងដោយសារបុរស២នាក់ជិះម៉ូតូឌុបគ្នាហើយទៅបុកម៉ូតូមួយគ្រឿងទៀតរងរបួសធ្ងន់ ត្រូវបានរថយន្តសង្រ្គោះបន្ទាន់បញ្ជូនទៅសង្រ្គោះនៅបន្ទាន់មន្ទីពេទ្យភ្លាមៗ កាលពីវេលាម៉ោង១១និង៥០នាទីថ្ងៃទី១៤ ខែ តុលា ឆ្នាំ២០១៧ ស្ថិតនៅតាមបណ្តោយផ្លូវជាតិលេខ៣ ខាងត្បូងនឹងកងពលតូចលេខ៧០ ស្ថិតនៅក្នុងសង្កាត់ចោមចៅ ខណ្ឌពោធិ៍សែនជ័យ ។

សាក្សីបានបានឲ្យដឹងថា មុនពេលកើតហេតុគេបានឃើញជនរងគ្រោះជិះម៉ូតូម៉ាកម៉ូតូហុងដាឌ្រីមឆ្នាំ២០១១ ពណ៌ខ្មៅ មួយគ្រឿង ពាក់ស្លាកលេខ កំពង់ចាម 1J-5734 ឌុបគ្នាធ្វើដំណើរ ក្នុងទិសដៅពីត្បូងទៅជើង ក្នុងល្បឿនលឿនគួរសម។លុះមកដល់ចំណុចកើតហេតុស្រាប់តែមានម៉ូតូមួយគ្រឿងទៀតម៉ាកហុងដាឌ្រីមដូចគ្នាស៊េរីឆ្នាំ២០១៤ ពាក់ស្លាកលេខ ភ្នំពេញ 1CF-8973 ដែលបើកបរដោយបុរសម្នាក់មិនស្គាល់អត្តសញ្ណាណធ្វើដំណើរ ក្នុងទិសដៅបញ្ច្រាសគ្នាបានមកដល់កន្លែងកើតហេតុឆ្លងមកខាងឆ្វេងដៃ ក្នុងបំណងចង់ឆ្លងផ្លូវ តែឆ្លងមិនទាន់ផុតផងក៏បានបុកគ្នាយ៉ាងពេញទំហឹងបណ្តាលឲ្យភាគីទាំងសងខាងដួលបោកខ្លួនទៅនឹងផ្លូវរងរបួសធ្ងន់ទាំងសងខាង។ រីឯម៉ូតូទាំងពីគ្រឿងក៏រងការខូចខាតយ៉ាងខ្លាំងដូចគ្នាផងដែរ។ ដោយឡែកជនរងគ្រោះទាំង៣នាក់ ត្រូវបានរថយន្តរបស់អង្គភាព៧១១ ដឹកបញ្ជូនទៅសង្រ្គោះបន្តនៅឯមន្ទីពេទ្យបង្អែកភ្លាមៗ ។

សាក្សីឲ្យដឹងទៀតថា ក្រោយពេលកើតហេតុ ដោយសារភាគីទាំងសងខាងរងរបួសធ្ងន់ ទើបកម្លាំងនគរបាលចរាចណ៍ផ្លូវគោកចុះទៅវាស់វែងដើម្បីយកយានជំនិះទាំងពីរគ្រឿងទៅរក្សាទុកចាំដោះស្រាយគ្នានៅពេលក្រោយ ៕ ប្រាថ្នា