សារព័ត៌មាន នគរវត្ត តែងតែនាំមុខគេជានិច្ច
ក្រចេះ៖មជ្ឈដ្ឋានមួយចំនួន លើកឡើងថា ជោគវាសនាលោក អេង ចំណាប់ ចៅក្រមតុលាការខេត្តក្រចេះ ពេលនេះ គឺអួអាប់ណាស់ក្រោយដោះលែងឈ្មួញឈើម្នាក់ហើយមានប្រតិកម្មខ្លាំងៗពីមន្ត្រីជាន់ខ្ពស់តុលាការ និង អាជ្ញាធរមូលដ្ឋាន ដែលអាចស្ទង់កម្តៅឡើងដល់១៨០អង្សាសេ ឯណោះ ។
ប្រភពព័ត៌មានច្បាស់ការណ៍មួយ បង្ហើបនៅថ្ងៃទី១៩ ខែតុលា នេះថា បើទោះបីជាមានការលើកឡើងថា នឹងមានការដាក់បណ្តឹងទៅលោក អង្គ វង្ស វឌ្ឍនា រដ្ឋមន្ត្រីក្រសួងយុត្តិធម៌ ជុំវិញចំណាត់ការមិនប្រក្រតីរបស់លោកចៅក្រម អេង ចំណាប់ ក្តី តែពេលនេះគឺពុំទាន់មានបណ្តឹងផ្លូវការណាមួយទេ ។
ប្រភពដដែល បន្តថា មន្ត្រីតុលាការកំពុងប្រជុំគ្នាដើម្បីដោះស្រាយករណីនេះ ដោយពុំចង់បន្តរឿងឱ្យវែងឆ្ងាយឡើយ កុំឱ្យប្រព័ន្ធយុត្តិធម៌នៅកម្ពុជា ទទួលការរិះគន់ពីមហាជនបន្តទៀត។
គួរបញ្ជាក់ថា ប្រធានតុលាការខេត្តក្រចេះ លោក ឌិត ស៊ីវុទ្ធី, ព្រះរាជអាជ្ញាអមសាលាដំបូងខេត្តក្រចេះ លោក កែវ សុជាតិ, ព្រះរាជអាជ្ញារងដឹកនាំកម្លាំងប្រតិបត្តិការលោក ជា សុភ័ក្រ, អភិបាលស្រុកស្នូល គង់ គឹមនី និងសមត្ថកិច្ចទាំងនគរបាល អាវុធហត្ថ ដែលចូលរួមប្រតិបត្តិការបង្ក្រាបការដឹកជញ្ជូនឈើខុសច្បាប់ បានចេញមកប្រតិកម្ម និងរិះគន់យ៉ាងខ្លាំងៗ ទៅលើចៅក្រមស៊ើបសួរសាលាដំបូង ខេត្តក្រចេះម្នាក់ គឺលោក អេង ចំណាប់ ដែលបានដោះលែងឈ្នួញដឹកជញ្ជូនឈើខុសច្បាប់ម្នាក់ ឲ្យត្រឡប់ទៅវិញបន្ទាប់ពីកម្លាំងសមត្ថកិច្ច និងអាជ្ញាធរជាច្រើននាក់តាមបង្ក្រាប និងចាប់ខ្លួនជនល្មើសរូបនេះ បានយ៉ាងលំបាក ពោលជនល្មើសបានបើករថយន្ដបុករថយន្ដសារ៉ែនរបស់សមត្ថកិច្ចទៀតផង។
បន្ថែមពីលើប្រតិកម្ម និងរិះគន់ជាបន្ដបន្ទាប់នេះ ប្រធានតុលាការ និងព្រះរាជអាជ្ញាខេត្តក្រចេះ គ្រោងសរសេរលិខិតមួយទៅកាន់រដ្ឋមន្ដ្រីក្រសួងយុត្តិធម៌ លោក អង្គ វង្សវឌ្ឍនា ដើម្បីសុំឲ្យចាត់ការតាមផ្លូវច្បាប់យ៉ាងតឹងរ៉ឹងទៀតផង។
កាលពីប៉ុន្មានថ្ងៃមុននេះ កម្លាំងសមត្ថកិច្ចចម្រុះទាំងនគរបាល និងអាវុធហត្ថស្រុកស្នូល ក្រោមការសម្របសម្រួលពីព្រះរាជអាជ្ញារង ជា សុភ័ក្រ និងដឹកនាំបញ្ជាផ្ទាល់ពីលោក គង់ គឹមនី ប្រធានគណៈបញ្ជាការឯកភាពស្រុកស្នូល បានបើកប្រតិបត្តិការ ចុះទៅបង្ក្រាបការដឹកជញ្ជូនឈើខុសច្បាប់ នៅក្នុងទឹកដីស្រុកស្នូល ស្ថិតនៅលើផ្លូវជាតិលេខ៧ ក្នុងឃុំខ្សឹម ដោយឃាត់បានរថយនដឹកឈើ និងដឹកអុសស្រស់រហូតដល់២៥គ្រឿង។
បន្ទាប់មកកម្លាំងសមត្ថកិច្ច ក៏បានឃាត់ខ្លួនអ្នកបើករថយន្ដដឹកឈើម្នាក់ឈ្មោះ រី សុភា អាយុ៣១ឆ្នាំ រស់នៅស្រុកមេមត់ ខេត្តត្បូងឃ្មុំ បន្ទាប់ពីជននេះបានបើករថយន្ដគេចពីសមត្ថកិច្ច ហើយបុករថយន្ដសារ៉ែនរបស់សមត្ថកិច្ច បន្ទាប់ពីដេញបង្ក្រាបរូបគេ។
លុះពេលចាប់ខ្លួនរួចជនសង្ស័យត្រូវបានបញ្ជូនទៅកាន់សាលាដំបូងខេត្តក្រចេះ ហើយត្រូវបានតំណាងអយ្យការចោទប្រកាន់ជាផ្លូវការ ប៉ុន្ដែគួរឲ្យភ្ញាក់ផ្អើលនៅពេលសំណុំរឿងនេះ បញ្ជូនទៅដល់ដៃចៅក្រម អេង ចំណាប់ បែរជាត្រូវលោកដោះលែងទៅវិញ។
ព្រះរាជអាជ្ញារង ជា សុភ័ក្រ ថ្លែងថាការដោះលែងនេះពិតជាមានភាពមិនប្រក្រតី លើនីតិវិធីប្រាកដមែន ហើយស្ថាប័នអយ្យការ នឹងប្ដឹងជំទាស់ករណីនេះ ទៅកាន់សាលាឧទ្ធរណ៍បន្ដទៀត។
ដោយឡែកអភិបាលស្រុកស្នួល លោក គង់ គឹមនី ក៏បានបង្ហាញការមិនពេញចិត្តយ៉ាងខ្លាំង ចំពោះចំណាត់ការរបស់លោកចៅក្រមរូបនេះ ដោយសារតែកម្លាំងសមត្ថកិច្ចមានប្រឈមមុខ និងបង្ក្រាបយ៉ាងលំបាកលើបទល្មើសមួយនេះ ហើយប្រឈមការគ្រោះថ្នាក់ទៀតផង។
លោក ករណីនេះប្រធានតុលាការ និងព្រះរាជអាជ្ញា នឹងសរសេរលិខិតទៅកាន់រដ្ឋមន្ដ្រីក្រសួងយុត្តិធម៌ ចាត់ការតាមផ្លូវច្បាប់លើចៅក្រមរូបនេះ។
យ៉ាងណាក៏ដោយ នៅមិនទាន់អាចសុំការបកស្រាយពីសំណាក់ចៅក្រម អេង ចំណាប់ ពាក់ព័ន្ធនឹងប្រតិកម្មធ្លាក់មកបន្ដបន្ទាប់ ពីសំណាក់ថ្នាក់ដឹកនាំតុលាការ និងសមត្ថកិច្ចខាងលើនេះ បាននៅឡើយទេ។
មន្រ្តីនគរបាលស្រុកស្នួលបានឲ្យដឹងថា សមត្ថកិច្ចចាប់ខ្លួននៅពេលដែលជននេះ បានព្យាយាមបើកឡានដឹកឈើបំណងបើកបំបុក សមត្ថកិច្ចតែត្រូវសមត្ថគេចផុត និងបានបើកបំបុកប៉ារ៉ាស់រុលទៅមុខ ហើយសមត្ថកិច្ចបានបើកតាមពីក្រោយ។ រហូតបើកតាមជាច្រើនគីឡូម៉ែត្រ ឡានដឹកឈើពេញរបស់ជនសង្ស័យបានបើកឡើងទួលទៅមុខមិនចង់រួច និងបានបើកបំបុកឡានស៊ីរ៉ែនប៉េអ៊ឹមស្រុកស្នួល ហើយ សមត្ថកិច្ចបានឡោមព័ទ្ធចាប់ខ្លួន បានទាំងរថយន្ត និងមនុស្សតែម្តង។ ជនសង្ស័យមានចរិកលក្ខណៈសាហាវ មិនគោរពច្បាប់ និងក៏ត្រូវសមត្ថកិច្ចចាប់ខ្លួនបានភ្លាមៗ ក្រោយពីជននេះបាន ធ្វើសកម្មភាពយ៉ាងសាហាវបែបនេះ។
មន្រ្តីជាន់ខ្ពស់តុលាការខេត្តក្រចេះ បានឲ្យដឹងផងដែរថា ក្រោយការចាប់ខ្លួន និងនាំខ្លួនមកសាកសួរជន សង្ស័យត្រូវបានស្ថាប័នអយ្យការ បានធ្វើការចោទប្រកាន់ពីបទ ធ្វើឲ្យខូចខាតដោយចេតនា តាមមាត្រា៤១០ នៃក្រមព្រហ្មទណ្ឌ និងបានបញ្ជូនសំណុំរឿងទៅចៅក្រម។ បើទោះជាបែបណា ជនត្រូវចោទត្រូវបានចៅក្រមស៊ើបសួរលោក អេង ចំណាប់ បានសម្រេចចេញដីកាមិន ឃុំខ្លួន ដោយអនុញ្ញាតឲ្យមានសេរីភាពវិញនៅថ្ងៃទី១៥ ខែតុលា។
បើតាមមន្ត្រីតុលាការ ជាមួយនិងការដោះលែងមិនឃុំខ្លួនជនត្រូវចោទនេះលោក អេង ចំណាប់ មិនបានសំអាងហេតុផលណាមួយនោះឡើយ ក្រៅពីតម្រូវឲ្យជនត្រូវចោទតម្កល់លុយ១លានរៀល នៅតុលាការ សម្រាប់ធ្វើជាសំណងរថយន្តរបស់សមត្ថកិច្ច ដែលជននេះបានបើកបំបុកឲ្យខូចខាតតែប៉ុណ្ណាះ។
បើតាមការលួចបង្ហើបពីសមត្ថកិច្ចខេត្តក្រចេះ ក៏បានឲ្យដឹងថា លោក អេង ចំណាប់ ពីមុនជាចៅក្រមនៅខេត្តសាលាដំបូងខេត្តរតនគីរី ហើយពេលបម្រើការងារនៅទីនោះ លោកចៅក្រមរូបនេះ និងបក្ខពួកមួយចំនួនទៀត បានរងនូវការចោទប្រកាន់ថា បានចូលផឹកស៊ី និងច្រៀងខារ៉ាអូខេ ក្នុងក្លិបដានវើល រហូតស្រវឹងជោកជាំ ហើយលោកចៅក្រម ក៏បានទាញយកក្បាលមីក្រូហ្វូនមកច្រៀង តែមិនឮដោយសារមិនបានបើកកុងតាក់ រួចលោកចៅក្រម យកក្បាលមីក្រូហ្វូននោះបោកនឹងតុ បណ្តាលឲ្យបែកមិនទទួលខុសត្រូវទៀតផង ហើយថែមទាំងស្រែកឡូឡា មិនចេញលុយសងទៀតផង ពេលម្ចាស់ខារ៉ាអូទារឲ្យចេញសង៕ ចេស្តា
