សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ដោយសារអាកាសធាតុមានការប្រែប្រួល នៅតាមបណ្តាលស្រុកនានាមួយចំនួនក្នុងខេត្តស្វាយរៀង នឹងមានភ្លៀងធ្លាក់ជាបន្តបន្ទាប់បណ្តាលឲ្យទៅជាជំនន់ទឹកភ្លៀងជន់លិចផ្ទះសម្បែងដីស្រែចំការ ផលដំណាំ រួមផ្សេងៗនិងប៉ះពាល់ដល់ជីវភាពរស់នៅប្រចាំថ្ងៃថែមទាំងបំផ្លាញផ្លូវជាច្រើនខ្សែនៅតាមជនបទផងដែរ។
បើតាមបងស្រីមានឈ្មោះ ពៅ សាញ់ ជាពលរដ្ឋរស់នៅក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្ត ស្វាយរៀងបានប្រាប់ភ្នាក់ងារយកព័ត៌មាននគរវត្តឲ្យដឹងថា ផ្ទះរបស់គាត់ ក៏ដូចជាផ្ទះពលរដ្ឋផ្សេងនៅក្នុងភូមិ ក៏ខុសគ្នាផងដែរ បានរងគ្រោះដោយសារជំនន់ទឹកភ្លៀងជន់លិចលង់ និងស្រែចំការមួយចំនួន ក៏ត្រូវបានរងផលប៉ះពាល់ និងធ្វើឲ្យជីវភាពរបស់ពួកគាត់ជួបផលលំបាកក្នុងការរកស៊ីទទួលទាន ជាពិសេសចាស់ជរាជួបកាលំបាកខ្លាំង។
បងស្រីបានបន្តប្រាប់ភ្នាក់ងារនគរវត្តទៀតថា រហូតមកដល់ពេលជាងមួយខែមកហើយ ដែលពលរដ្ឋក្នុងភូមិជួបគ្រោះធម្មជាតិដោយជំនន់ទឹកភ្លៀង ហើយផ្ទះពលរដ្ឋនៅតំបន់ទាប គឺត្រូវលិចខ្លាំងជាងនេះ ត្រូវសម្រេចចិត្តធ្វើស្ពានដើម្បីដើរឆ្លងទៅមក ហើយជីវភាពសព្វថ្ងៃ ក៏ពិបាកជាងមុនផងដែរ ជាពិសេសក្មេងតូចៗ និងមនុស្សចាស់ងាយរងគ្រោះខ្លាំងណាស់ដោយជំងឺតម្កាត់ផ្សេងៗ។
លោក ខាំ រឿន ចៅ សង្កាត់ព្រៃអង្គុញ បានឲ្យភ្នាក់ងារកាសែតនគរវត្តដឹងថា នៅក្នុងសង្កាត់ព្រៃអង្គុញ ភូមិចំនួន៣ ត្រូវបានជំនន់ទឹកភ្លៀងជន់លិច ហើយខាងក្រុមការងារ ក៏ដូចលោកអភិបាលក្រុងបាវិត បានចុះសួរសុខទុក្ខពលរដ្ឋដែលរងគ្រោះដោយសារជំនន់ទឹកភ្លៀង ដោយក្នុងនោះមានតែ៦៨គ្រួសារដែលរងគ្រោះ។
លោកចៅសង្កាត់បានបន្តទៀតថា ភ្លៀងនៅតែបន្តធ្លាក់រហូតធ្វើឲ្យទឹកមិនព្រមស្រកនោះថែមទាំងជន់លិចលង់ផ្ទះសម្បែងពលរដ្ឋកាន់តែខ្លាំងហើយលោកបានរាយការណ៍ទៅខាងសាលាក្រុងបាវិតរួចរាល់អស់ហើយដែរ។
លោក សេង សីលា អភិបាលក្រុងបាវិតឲ្យភ្នាក់ងារនគរវត្តដឹងថា ជុំវិញបញ្ហាជំនន់ទឹកភ្លៀងជន់លិចភូមិឋានរបស់ប្រជាពលរដ្ឋនៅក្រុងបាវិត គឺមានចំនួន៤សង្កាត់ ដែលរងគ្រោះ រងផលប៉ះពាល់ពលរដ្ឋជិត៥០០គ្រួសារ ហើយការជន់លិចនេះ រូបលោក និងក្រុមការងារបានចុះសួរសុខទុក្ខ និងចែកអំណោយដល់ពួកគាត់ផងដែរ។ ប៉ុន្តែការជន់លិចនេះ នៅតែបន្តលិចនៅតំបន់ទាប។ ចំណែកខាងលើៗ ទីទួលទើបតែលិចនោះទេ។
លោកអភិបាលក្រុងបានបន្តប្រាប់នគរវត្តទៀតថា លោកនឹងចាត់ឲ្យក្រុមការងារចុះស្រាវជ្រាវផ្ទះពលរដ្ឋបន្ថែមទៀតដើម្បីរកជំនួយជួយដល់ពួកគាត់ ព្រោះចំនួនផ្ទះពលរដ្ឋលិចដោយសារជំនន់ទឹកភ្លៀងមានច្រើន៕ យឹម សុថាន
