សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសសង្ស័យជាចោរឆក់កាបូបម្នាក់ត្រូវប្រជាពលរដ្ឋចាប់បាន នាំគ្នាវាយសំពងរងរបួសទ្រមខ្លួន ទើបប្រគល់ឲ្យសមត្ថកិច្ចបង្កការភ្ញាក់ផ្អើលកាលពីម៉ោង១៨ ថ្ងៃទី១១ ខែវិច្ឆិកា ឆ្នាំ២០១៧ នៅចំណុចផ្លូវ១០០៣ភូមិបាយ៉ាបសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចឲ្យដឹងថា ជនសង្ស័យឈ្មោះយ៉ាន វិរះ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅភូមិទួលគោកសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ និងមានស្រុកកំណើតភូមិក្រោលគោ ឃុំក្រោលគោ ស្រុកស្វាយជ្រុំខេត្តស្វាយរៀង។ រីឯម្ចាស់កាបូបរងគ្រោះ ឈ្មោះ សេង គន្ធី ភេទប្រុស អាយុ៣៤ឆ្នាំ មុខរបរមន្ត្រីរាជការ ស្នាក់នៅផ្ទះលេខ១៤ ផ្លូវ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចថា នៅមុនកើតហេតុជនរងគ្រោះកំពុងជិះកង់ហាត់ប្រាណមកលេងឃ្លាំងបងនៅផ្លូវ១០១៩ក្រោយមក ក៏ជិះកង់គោលបំណងត្រឡប់ទៅផ្ទះវិញ ដោយជិះតាមផ្លូវ១០០៣ ក្នុងទិសដៅពីត្បូងទៅជើង មកដល់ចំណុចខាងលើ ស្រាប់ តែមានជនសង្ស័យម្នាក់ ជិះម៉ូតូ SUZUKI Let’s ពណ៌ខ្មៅ លាយទឹកប្រាក់ មកពីក្រោយធ្វើ សកម្មភាពឆក់យកកាបូបពណ៌ត្រេអ៊ី ដែលគាត់វ៉ាត់ជាប់នឹងចង្កេះ ពេលនោះគាត់បានប្រទាញប្រទង់ជាមួយជនសង្ស័យធ្វើឲ្យដួលកង់ចំណែកជនសង្ស័យដួលម៉ូតូផងដែរ ហើយរត់ចូលក្នុងទឹកស្រះ។
ជនសង្ស័យត្រូវសមត្ថកិច្ចនៅក្បែរនោះចាប់ខ្លួនបានភ្លាមៗ និងបានដកហូតកាបូបរបស់ជនរងគ្រោះបានវិញដែលមានលុយជាង៥០ដុល្លា ទូរស័ព្ទដៃទំនើប២គ្រឿង និងអិនចុចពិលមួយគ្រឿង កាតអេធីអឹម និងសម្ភារមួយចំនួន។
សូមបញ្ជាក់ថា ការលួច ឆក់ ឬប្លន់ទ្រព្យសម្បត្តិអ្នកដទៃ មិនឈ្មោះថា ពលរដ្ឋល្អនោះឡើយ ។ លួចថ្ងៃនេះបានវាគ្រាន់ ប៉ុន្តែលួច ឬឆក់ញយដងពេកទៅ គង់តែគេចាប់បានមិនខាន ។ ដូច្នេះគួរតែយើងចូលរួមប្រឹងប្រែងធ្វើអ្វីដែលត្រូវច្បាប់ ទើបជាការប្រសើរជាង ៕
