សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលខណ្ឌសែនសុខ បានបន្តចាប់ក្រុមក្មេងស្ទាវៗ ដែលមានផ្ទុកសារធាតុញៀនបាន៥នាក់ បន្ទាប់ពីត្រួតពិនិត្យទឹកនោម កាលពីយប់ថ្ងៃទី១៦ ខែវិច្ឆិកា ឆ្នាំ២០១៧ ចោទថា ពួកគេប្រើប្រាស់ថ្នាំញៀនខុសច្បាប់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។
លោក សុខ សុផល នាយប៉ុស្តិ៍នគរបាលរដ្ឋបាលសង្កាត់ទឹកថ្លាបានឲ្យដឹងថា ការឃាត់ខ្លួនយុវជនទាំង៥នាក់ខាងលើធ្វើឡើងនៅ ខណៈដែលពួកគេកំពុងជិះម៉ូតូឆ្លងកាត់គោលដៅកន្លែងត្រួតពិនិត្យអាវុធជាតិផ្ទុះរបស់គណៈបញ្ចាការឯកភាពខណ្ឌសែនសុខ កាលពីម៉ោង២១និង៥០នាទី ថ្ងៃទី១៦ ខែវិច្ឆិកា ឆ្នាំ២០១៧ នៅតាមបណ្តោយផ្លូវភ្នំពេញ ហាណូយ មុខទីស្នាក់ការនគរបាលរដ្ឋបាលប៉ុស្តិ៍ទឹកថ្លា បន្ទាប់ពីបានធ្វើតេស្តទឹកនោមពួកគេរកឃើញមានផ្ទុកនូវសារធាតុញៀន។
យុវជនជាប់ចោទទាំង៥នាក់នោះមានឈ្មោះ ១ ឈ្មោះ ស ពិសិដ្ឋ អាយុ២៣ឆ្នាំ កម្មករនៅសង្កាត់ទឹកថ្លា, ២.ឈ្មោះ ហឹន ដែន អាយុ២០ឆ្នាំ កម្មករសំណង់ នៅអន្លង់ក្ងាន, ៣.ឈ្មោះ ពៅ ពន្លក អាយុ២៣ឆ្នាំ នៅអូរបែកក្អម,៤.ឈ្មោះ ឈុំ តួ អាយុ២៥ឆ្នាំ កម្មករសំណង់ នៅខណ្ឌទួលគោក និង ៤.ឈ្មោះ សុខ រិទ្ឋ អាយុ២១ឆ្នាំ មុខរបរព្រូឡាន។
សមត្ថកិច្ចកំពុងឃាត់ខ្លួនពួកគេដោយចោទប្រកាន់ថា បានប្រើប្រាស់ថ្នាំញៀនខុសច្បាប់ និងត្រៀមបញ្ជូនទៅតុលាការវិនិច្ឆ័យទោសតាមច្បាប់៕ តុង សីហា
