សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរស៣នាក់បានរងរបួសធ្ងន់ ដោយសារករណីគ្រោះថ្នាក់ចរាចរណ៍ជិះម៉ូតូបុកគ្នាទិសដៅបញ្ច្រាសគ្នាយ៉ាងពេញទំហឹងលាន់សូរដូចរន្ទះកាលពីវេលាម៉ោង១០ព្រឹក ថ្ងៃទី២១ ខែវិច្ឆិកា ឆ្នាំ២០១៧ នៅភូមិព្រៃធ្លក ឃុំស្វាយតាយាន ស្រុកកំពង់រោទ៍ ខេត្តស្វាយរៀង។
យោងតាមសមត្ថកិច្ចនគរបាលស្រុកបានឲ្យនគរវត្តដឹងថា មុនកើតហេតុ មាន ម៉ូតូម៉ាក់វីស្តុន ពណ៌សគ្មានស្លាកលេខ បើកបរដោយ ឈ្មោះ រ័ត្ន សានី ភេទប្រុស អាយុ១៨ឆ្នាំ រស់នៅភូមិសាមគ្គី សង្កាត់ច្រកម្ទេស ក្រុងបាវិត និងអ្នករួមដំណើរម្នាក់ឈ្មោះ វាន់ ឆារ៉ាយុទ្ធ ភេទប្រុស អាយុ១៨ឆ្នាំ រស់នៅភូមិដើមពោធិ៍ ឃុំកណ្ដៀងរាយ ស្រុកស្វាយទាប ដោយធ្វើដំណើរមកពីទិសខាងត្បូងទៅជើងក្នុងល្បឿនយ៉ាងលឿន ស្រាប់តែទៅបុកម៉ូតូម៉ាកសេ១២៥ សេរី ឆ្នាំ២០១១ ពណ៌ស មានស្លាក់លេខ ស្វាយរៀង ១c៧១៣៣ បើកបរដោយឈ្មោះ លឹម បញ្ញា ភេទប្រុស អាយុ២៤ឆ្នាំមុខរបរ ជាបុគ្គលិកធនាគារLOLC រស់នៅភូមិព្រៃឈើទាល ឃុំអង្គតាសូ ស្រុកស្វាយជ្រុំ ដែលបើកពីជើងទៅត្បូង បញ្ច្រាសគ្នាពេញទំហឺងបណ្ដាលអ្នកបើកបរម៉ូតូទាំងសងខាងដួលរណូករណែលកណ្ដាលផ្លូវគួរឲ្យរន្ធត់។
ក្រោយមកអ្នកភូមិបានរាយការណ៍មកសមត្ថកិច្ចមូលដ្ឋានមកវាស់វែងព្រមទាំងយកភាគីរងគ្រោះមកព្យាបាលនៅមន្ទីរពេទ្យស្វាយរៀងព្រមទាំងវាស់វែង និងអូសវត្ថុតាងមកកាន់ប៉ុស្តិ៍រដ្ឋបាលឃុំស្វាយតាយានដោះស្រាយពេលក្រោយ៕ យឹម សុថាន
