សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ព្រោះតែគ្រឿងស្រវឹង បានធ្វើឲ្យបុរសម្នាក់បានពិសារស្រារហូតឈានទៅដល់ការគ្រប់គ្រងស្មារតី បានបើកម៉ូតូម្នាក់ឯង បណ្ដាលឲ្យដួលបោកទៅនឹងខឿនសួនច្បារអូសជាច្រើនម៉ែត្រ រងរបួសបែកក្បាលហូរឈាមប្រឡាក់ពេញថ្នល់ និងធ្លាយខួរចេញមកខាងក្រៅគួរឲ្យរន្ធត់ ហើយត្រូវបានរថយន្តសាមុយដឹកទៅសង្គ្រោះនៅមន្ទីរពេទ្យកាលម៉ែត ដើម្បីសង្គ្រោះបន្ទាន់ផងដែរ ។
ករណីគ្រោះចរាចរណ៍ខាងលើនេះ បានកើតឡើងកាលពីវេលាម៉ោង១១យប់ថ្ងៃទី២៩ ខែវិច្ឆិកា ឆ្នាំ២០១៧ នៅតាមបណ្តោយផ្លូវព្រះសុរាម្រិត ទល់មុខមូលដ្ឋានកងរាជអាវុធហត្ថខណ្ឌដូនពេញ ស្ថិតក្នុងសង្កាត់ចុតមុខ ខណ្ឌដូនពេញ រាជធានីភ្នំពេញ។
តាមប្រភពព័ត៍មានពីសាក្សីនៅកន្លែង បានឲ្យដឹងថា មុនកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកហុងដា អាយខន ពណ៍ស ពាក់ស្លាកលេខ ភ្នំពេញ 1BM-4403 ដោយធ្វើដំណើរតាមបណ្តោយផ្លូវព្រះសុរាម្រិត ក្នុងទិសដៅពីកើតមកលិច លុះមកដល់ចំណុចកើតហេតុទល់មុខមូលដ្ឋានកងរាជអាវុធហត្ថខណ្ឌដូនពេញ ក៏រ៉េចង្កូតដួលដោយខ្លួនឯងបោកទៅនិងថ្នល់ អូសជាច្រើនម៉ែត្របណ្តាលឲ្យបោកក្បាលរងរបួស
ក្រោយកើតហេតុជនរងគ្រោះ ត្រូវបានរថយន្តសាមុយ ដឹកបញ្ជូនទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូត្រូវបានសមត្ថកិច្ចយកមករក្សាទុកឲ្យក្រុមគ្រួសារជនរងគ្រោះវិញ ៕ ស តារា
