ភ្នំពេញ ៖ ដោយសារគ្រឿងស្រវឹង បានធ្វើឲ្យបុរសម្នាក់បើកបរម៉ូតូ ក្នុងល្បឿនលឿនមិនប្រយ័ត្ន ត្រង់ចំណុចផ្លូវកោងកាច់ចង្កូតមិនទាន់ ជ្រុលបុកនឹងខឿនផ្លូវបណ្ដាលឲ្យដួលបោកទៅនិងថ្នល់រងរបួសបែកមុខបែកមាត់ កាលពីវេលាម៉ោង ៩ និង ៣០នាទី យប់ថ្ងៃទី២៩ ខែវិច្ឆិកា ឆ្នាំ២០១៧ ស្ថិតនៅរង្វង់មូលព្រុំមុខបួន ក្នុងសង្កាត់ជ្រោយជង្វារ ខណ្ឌជ្រោយជង្វារ រាជធានីភ្នំពេញ។
តាមប្រភពព័ត៍មានពីសាក្សីនៅកន្លែងកើត មុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកហុងដាស្កុបពីពណ៌ស ពាក់ស្លាកលេខ ភ្នំពេញ 1DB-4366 បើកបរក្នុងទិសដៅពីកើតទៅលិច លុះបើកមកដល់ចំណុចកើតហេតុខាងលើជាផ្លូវកោង បានកាច់ចង្កូតមិនទាន់ក៏ជ្រុលទៅបុកនឹងខឿនផ្លូវ បណ្ដាលឲ្យដួលម៉ូតូបោកទៅនិងថ្នល់រងរបួសធ្ងន់តែម្តង ។
ក្រោយកើតហេតុ បុរសរងគ្រោះត្រូវបានរថយន្តសាម៉ុយដឹកបញ្ជូនទៅមន្ទីរពេទ្យភ្លាមៗ ដោយឡែកម៉ូតូរងការខូចខាតផ្នែកខាងមុខ ត្រូវបាននគរបាលជំនាញ យកទៅរក្សាទុកនៅការិយាល័យចរាចរណ៍ក្រុង រងចាំម្ចាស់ម៉ូតូមកទទួលយកត្រលប់ទៅផ្ទះវិញ ៕ជ្រោយពេជ្យ
សារព័ត៌មាន នគរវត្ត តែងតែនាំមុខគេជានិច្ច
